மனிதர்கள் மனிதர்களை பற்றி கணிக்கும் கணிப்பு (மதிப்பீடு) சரியா?

மனிதர்கள் மனிதர்களை பற்றி கணிக்கும் கணிப்பு (மதிப்பீடு) சரியா?


நாம் அனைவரும் அவசரமாக முடிவு எடுத்து கருத்துச் சொல்பவர்கள்தான் அல்லது மனதில் நினைத்துக் கொள்பவர்களாகவே இருக்கிறோம் அதற்கு நானோ நீங்களோ இந்த நிமிஷம் வரை விதிவிலக்கு அல்ல. இது பொதுவான மனித இயல்புதான்.இப்படி ஒரு முடிவு எடுக்கும் இயல்பு சரியானதாக என் மனதிற்குப் படவில்லை. நாம் மற்றவர்களை விட உயர்வாகவோ தாழ்வாகவோ இருப்பதாக நினைத்து நாம் எடுக்கும் அவசர முடிவு இருவருக்குள்ளும் ஒரு பெருத்த இடைவெளியை ஏற்படுத்திவிடும்

ஒரு நொடி யோசித்துப் பாருங்கள்: நாம் ஒருவரைப் பார்க்கிறோம், அவர்களின் தோற்றம் அல்லது செயல்களின் அடிப்படையில், அவர்களைப் பற்றிய ஒரு முடிவுக்கு வருகிறோம் .அது சரியான முடிவாக(மதிப்பீடு) இருக்குமா  என்றால் இல்லை என்பதுதான் சரியான பதிலாக இருக்க முடியும். நாம் பொது இடங்களுக்குச் செல்லும்போதோ அதாவது உணவகம்,  பொது நிகழ்வுக்கிற்கு, பேருந்து ,ரயில் ,விமானம் பயணம் மேற்கொள்ளும் போது நம் அருகில் ஒரு பிராமணர், இஸ்லாமியர்,கிறிஸ்துவர்,குஜராத்தி,படித்தவன்,படிக்காதவன்.கூலித் தொழிலாளி,அழுக்கு உடையை அணிந்து இருப்பவர் இப்படிப் பலரைச் சந்திக்க நேரிடும்.. உடனே நாம் அவரின் தோற்றம் மதம் சாதி இப்படிப் பலவற்றைக் கருத்தில் கொண்டு உடனடியாக நாம் ஒரு முடிவிற்கு(மதிப்பீடு) வந்துவிடுவோம்.
  

ஒருவரை பற்றி நமக்கு ஏதும் தெரியாத நிலையில் அவர் கூட எந்த ஒரு வித உரையாடல் இல்லாமல் அந்த நபரைப் பற்றித் தெரிந்துகொள்ளவோ அல்லது அவர்களைப் புரிந்துகொள்ளவோ முயற்சி செய்யாமல் கணிப்பை(மதிப்பீடு) உருவாக்குவது எப்படிச் சரியாக இருக்க முடியும்



அது போல நமக்குத் தெரிந்தவர்கள் மீதான கணிப்பை(மதிப்பீடு) எடுக்கும் போது என்ன நடக்கிறது என்பதைக்  சற்று பார்ப்போம்.

அவர்கள் செய்யும் ஒரு காரியத்தை நாம் காண்கிறோம், அதனால் நாம் உடனே கோபமோ ஏமாற்றமோ அடைகிறோம், அல்லது அவர்களைப் பற்றி மோசமாக நினைக்கிறோம் அல்லது  புரியாமல் ,அவரின் சூழ்நிலை என்னவாக இருக்கிறது என்பதை அறியக் கூட முயலாமல் அவரைப் பற்றி ஒரு முடிவுக்கு வருகிறோம்.

அப்படி ஒரு முடிவிற்கு வராமல்  அவருடன் பேசுவது அல்லது உரையாடுவதை தொடங்குவதன் மூலம் கொஞ்சம் கொஞ்சமாக புரிந்து கொள்ளத் ஆரம்பிக்கிறோம், மேலும் அந்த  புரிதலின் மூலம் இருவர்க்களிடையே ஒரு நல்லுறவு என்ற பாலத்தை உருவாக்கிக் கொள்கிறோம்.

 ஆனால் இப்படி நாம் சந்திக்கும் ஒவ்வொரு நபருடனும் ஒரு உறவை உருவாக்க முடியுமா என்றால் பதில் அநேகமாக இல்லை என்றுதான் இருக்கும் காரணம். அதற்கு நேரமும் முயற்சியும் தேவை, ஆனால் இந்த இரண்டிற்கும் கொஞ்சம் நம் மனதை ஒதுக்க முடியுமானால் அது நம் வாழ்க்கையில் மிகப் பெரிய ஒரு மாற்றத்தை ஏற்படுத்தும் என்பது உறுதி
 

நம்மிடம் நேரமில்லாத போது அடுத்தவரை பற்றி தவறாக நினைப்பதற்கு பதிலாக அவர்களைப் பற்றி நல்லதாகவே நினைத்து அவர்களை பார்த்து புன்னகை செய்யலாம்தானே அப்படி செய்வதால் இருவருக்குள்ளும் மனதளவில் ஒரு நல்ல எண்ணம் தோன்றத்தானே செய்யும்

நம் கணிப்பு வழங்குவதைத் தவிர்த்து, அதற்குப் பதிலாக இரண்டு மனிதர்களிடையே ஒரு உறவை உருவாக்க முயற்சி செய்வோம்

அதற்கு நாம் என்ன செய்யலாம் என்பதைப் பார்ப்போம்.


எந்த ஒரு விஷயத்திலும் நாம் நம் கணிப்பை உடனடியாக வழங்க வேண்டாம். நாம் ஒரு கணிப்புக்கு அல்லது முடிவிற்கு வரும் போது அதை அப்படியே நிறுத்துங்கள் அதன் பின் நம் எண்ணங்களைச் சில நாட்கள் அவதானித்து , அதன் பின் நாம் ஒரு முடிவிற்க்கு வரும் போது அல்லது உணரும் போது  அதை அப்படியே நிறுத்தி அடுத்தக் கட்டத்திற்குச் செல்வோம்

இங்கே நாம் அவரைப் புரிந்து கொள்ள முயற்சி செய்வோம் அவர் என்ன செய்தார் என்பதைக் கண்டு அவர் மீதான கணிப்பை எடுக்கும் முன் அந்த நபரைப் புரிந்துகொள்ள முயலவேண்டும் அதற்கு ஆங்கிலத்தில் இப்படி Put yourself in their shoes என்று சொலவது போல என்று நினைத்து நாம் செயல்பட வேண்டும் முடிந்தால் அவரிடம் பேசுங்கள் அவரது பின்ணணியைக் கற்பனை செய்து பாருங்கள், ஒவ்வொருவருக்கும்  ஒரு செயலை செய்வதற்கு நிச்சயம் ஏதாவது ஒரு பின்னணி இருக்கும் அதை அறிய முயலுங்கள் இல்லையென்றால், அந்த நபர் செயல்படுவதற்கோ அல்லது அவர்கள் தோற்றமளிப்பதற்கோ வழிவகுத்த சூழ்நிலைகளைக் கற்பனை செய்து பாருங்கள்.  

அப்படி அவரை நாம் புரிந்து கொண்ட பின், அவரை மாற்ற முயற்சிக்காமல் ,அவர் யார் என்பதை ஏற்றுக்கொள்ளுங்கள் யாரும் எளிதில் மாறமாட்டார்கள் அதுதான் உலகத்தில் இருக்கும் பொதுவான் நடை முறை .அது புரியாமல் நாம் முயற்சி செய்தால் கொஞ்சம் மட்டுமே அவரை மாற்ற முடியும் ஆனால் நீண்ட காலத்திற்குப் பின் அந்த மாற்றமும் காணாமல் போய்விடும் அது நமக்குத் தெரியவந்தால் நமக்கு விரக்தி ஆகிவிடுவோம் அதனால் யாரையும் மாற்ற முயற்சிக்காமல் அவரை நீங்கள் புரிந்து கொள்ளுங்கள் அல்லது அவருக்குப் புரிய வையுங்கள்

அவரை உள்ளது உள்ளபடியே நாம் ஏற்றுக்கொண்டவுடன், அவரை நேசிக்க முயற்சி செய்யுங்கள்.நீங்கள் அவரை அறியாவிட்டாலும் கூட. கடந்த காலத்தில் நீங்கள் அவரை வெறுத்திருந்தாலும் கூட. அவரை ஒரு சகோதரனாக , சகோதரியாக அவர்கள் யாராக இருந்தாலும், வயதானவர்களாகவோ, இளமையாகவோ, கருப்பாகவே சிவப்பாகவோ , ஆணோ பெணோ, பணக்காரனோ ஏழையோ ,பிராமணனோ, இஸ்லாமியனோ, கிறிஸ்துவனோ, குஜராத்தியோ பஞ்சாபியோ, அரேபியனா ஆப்பிரிக்க அமெரிக்கக் கண்டத்தைச் சார்ந்தவனோ எதையும் பொருட்படுத்தாமல் நேசியுங்கள்

அன்பை ஒருவரிடம் வெளிப்படுத்தும் போது அவர் நமக்குத் தீமையா செய்வார்.? நாம் மற்றவர்கள் மீது காட்டும் அன்பு பரிவு இதெல்லாம் நமக்குத் திரும்ப மகிழ்ச்சி என்ற வடிவத்தில் நம்மை வந்தடையும்.மற்றவர்களை நேசிப்பது மற்றவர்களின் வாழ்க்கையை மாற்றும், அந்த அன்பை வெளிப்படுத்த நீங்கள் தேர்வு செய்தால் அது உங்கள் வாழ்க்கையையே அடியோடு மாற்றும் என்பது மிக உறுதி

நேற்று என்பது முடிந்த விஷயம். அது இறந்து போன காலம். அதே போல நாளை என்பது யாரும் அறிந்துகொள்ள முடியாத எதிர்காலம். எனவே அவற்றில் நேரத்தைச் செலவிடுவது மடமை.

அந்த வகையில் நிகழ்காலம் மட்டுமே நம்முடைய ஆளுகைக்கு உட்பட்டது. அதை ஒவ்வொரு கணமாக முழுமையாக வாழ வேண்டும்’ அதற்கு நாம் மற்றவர்களிடம் அன்பாக இருக்க வேண்டும் அவர்களைப் புரிந்து கொண்டு வாழ்க்கையை முன்னோக்கி நகர்த்திக் கொண்டு போகவேண்டும்


அன்புடன்
கொரோனா ஞானி
மதுரையானந்தா (மதுரைத்தமிழன்)