02. ஓ.....அமெரிக்கா! ( பகுதி 2 )

முந்தையை பதிவு: 01. ஓ.....அமெரிக்கா! ( பகுதி 1 )

அமெரிக்கா....பலரின் வாழ்க்கையில் கனவாகவும் சிலரின் வாழ்க்கையில் அது நிஜமாகவும் ஆகிவிட்டது. சில நேரங்களில் நிஜம் சுடவும் செய்யும். ஆம் அமெரிக்கா என்பது நெருப்பை போல பார்க்க அழகாகவே இருக்கிறது அதை மிகவும் நெருங்கினால் சில சமயங்களில் சுடவும்தான் செய்கிறது

அமெரிக்கா வாழ்க்கை என்பது ஒரு ஏழ்மையான கிராமத்து இளைஞன் மிக அழகான மிக அதிக வசதி உள்ள நகரத்து பெண்ணை திருமணம் செய்து கொண்டு வாழ்வது போலத்தான். கல்யாணம் ஆன புதிதில் மிகவும் சந்தோஷமாகவும் அழகான பெண் கிடைத்த கர்வமும் இருக்கும் அதே நேரத்தில் தீடிரென கிடைத்த வசதி வாய்ப்புகளும் நம் கண்ணை மறைத்து நம்மை மகிழ்ச்சியில் ஆழ்த்தும். ஆனால் போகப் போகத்தான் புரியும் நாம் கிராமத்தில் நாம் அனுபவத்த சந்தோஷங்கள் என்றும் நீங்காதவைகளாக நம் மனதில் ஆழ்ந்து ஒரு ஏக்கத்தை தந்து கொண்டிருக்கும் என்பது.

கிராமத்தில் இருந்த போது கூழோ கஞ்சியோ கிடைத்தாலும் அதை சாப்பிட்டு சந்தோஷமாக இருக்கலாம்.சொந்த பந்தங்கள் வீட்டிற்கு எந்நேரமும் செல்லாம். பண்டிகை நாட்களில் ஒன்று கூடி மகிழாம்.கல்யாணம் , காது குத்தல், சடங்கு சாவு, கோவில்கள் மற்றும் விஷேச தின கொண்டாட்டங்களில் ஆடி பாடி மகிழலாம்.

ஆனால் இது எல்லாம் வசதியான வீட்டு மாப்பிள்ளையாகி போன போது நம்மை விட்டு விலகிவிடும். வசதியான வீட்டு மாப்பிள்ளையாகி போனது போது சுத்தம் மிகுந்த, வசதிகள் நிறைந்த பங்களாவில் வசிக்கலாம் விலை உயர்ந்த காரில் செல்லலாம். அழகான மனைவி வாய்க்கலாம் ஆனால் அவள் குடும்பத்தில் உள்ள அனைவரும் ஏழ்மை குடும்பத்தில் இருந்து வந்த உங்களை மதிக்காமல் இருக்கலாம். உங்களுக்கு அந்த வீட்டில் முழு உரிமை இருந்தாலும் அதை எதிர்த்து உங்களால் ஒன்றும் செய்ய முடியாது. என்னடா இந்த வசதியான வாழ்க்கை நாம் கிராமத்தில் வசித்த போது நண்பர்களின் தோளின் மீது கைபோட்டு ஒரு டீயை வாங்கி இருவரும் குடித்து ஒரு தட்டில் உள்ளதை இருவரும் பங்கிட்டு சாப்பிட்டு கயிற்று கட்டிலில் வெயில் காலங்களில் வீட்டிற்கு வெளியே படுத்து உறங்கிய போது உள்ள சந்தோஷம் இப்போது இல்லையே என்று நினைக்க தோன்றும் .. அதன் நினைவாக நம் மனதில் ஏக்கமும் உருவாகும். ஆனால் இப்போது உள்ள நிலைமையில் நாம் இருக்கும் நிலமையை விட்டு வெளி வரமுடியாமல் இரு தலை கொள்ளியாக தவித்து தவித்து நம் வாழ்க்கை முடிந்து போய்விடும்.

அது போலத்தான் அமெரிக்க வாழ்வும்.. இப்படி பட்ட வாழ்க்கையைதான் நானும் என்னைப் போல பலரும் அமெரிக்கா வந்து வாழ்ந்து கொண்டிருக்கிறோம். இப்போது சொல்லுங்கள் உங்களுக்கு எந்த வாழ்க்கை முக்கியம்...

நீங்கள் ஏன் அமெரிக்க வந்தீர்கள் என்பவர்களுக்காக .... எனது திருமணம் காதல் திருமணம் இரு வேரு மதங்களை சார்ந்தவர்கள். நாங்கள் எங்கள் வீட்டவர்கள் சப்போர்ட் இல்லாமல் ரிஜஸ்டர் ஆபிஸில் 5 நண்பர்கள் உதவியுடன் கல்யாணம் செய்து கொண்டு வாழ்வை தொடங்கினோம், வேறு மதத்தவர்கள் காதல் திருமணம் என்பதால் சென்னையில் வீடு வாடகைக்கு கொடுக்க தரமறுத்தவர்கள் அநேகம் அந்த நேரத்தில் நண்பர் ஒருவர் தன் வீட்டில் வசித்தவரை காலி செய்துவிட்டு அந்த வீட்டை வாடகைக்கு தந்தார் வாடகை சற்று அதிகம்தான் ஆனால் அந்த கால கட்டத்தில் சென்னையில் கம்பெனிகளில் சம்பளம் அதிகம் தருவதில்லை. எனவே நாங்கள் வெளிநாடு சென்று சம்பாதிக்க முடிவு செய்தோம் பல நாடுகளுக்கு போக முயற்சி செய்து (நாங்கள் செளத் ஆப்ப்ரிக்காவிற்கும் முயற்சி செய்தோம் கிடைக்கவில்லை என்பது வேறு விஷயம் )இறுதியில் அமெரிக்க வாய்ப்பு கிடைத்தது அதை நாங்கள் உபயோகித்து இன்று அங்கு வசித்து வருகிறோம். வந்தாரை வாழ வைக்கும் தமிழகம் போல அமெரிக்காவும் இதுவரை எங்களை வாழ வைத்து கொண்டுதான் இருக்கிறது. இந்த நிமிடம் வரை இந்தியாவை நேசிக்கும் அமெரிக்க சிட்டிசன்தானுங்க இதுதானுங்க நான் அமெரிக்க வந்த கதைங்க..வசிக்கும் கதைங்க

சரி மேலும் இதை சொல்லி போரடிக்காமல் விஷயத்திற்கு போவோம்...

நண்பர்களே உங்களிடம் பணம் இருக்கிறதா அப்படியென்றால் இந்தியாவிலேயே இருங்கள் பல நிறை குறைகள் இருந்தாலும் அங்குள்ளது போல ஒரு உயிரோட்டமுள்ள வாழ்க்கை உங்களுக்கு எங்கும் கிடைக்காது. என்னிடம் பணம் இல்லை (Scratch )ஸ்க்ராச்சில் இருந்துதான் வாழ்க்கையை ஆரம்பிக்க வேண்டும் அதே நேரத்தில் வசதியானவர்கள் வாழும் வாழ்க்கையும் வாழவும் வேண்டுமென்று நினைத்தால், அமெரிக்கா வர வாய்ப்புகள் கிடைத்தால் தாராளமாக வரலாம், மக்கள் அனைத்து இடங்களிலும் ஒன்று போலத்தான் இருக்கிரார்கள் அதாவது நல்லவர்களும் உள்ளனர் கெட்டவர்களும் உள்ளனர். நாம்தான் அவர்களோடு கலந்து வாழ கற்றுக் கொள்ள வேண்டும்.

நண்பர்களே இந்தியாவில் மிடில் க்ளாஸில் உள்ள தம்பதிகள் 2 பேர் நல்ல வேலையில் இருந்து ஒர் அளவிற்கு நல்ல சம்பளம் பெறுபவர்களாக இருந்தால் நன்றாக ப்ளான் பண்ணினால் நீங்கள் நன்றாக சேமித்து வீடு வாசல் கார் சேமிப்பு என்று நன்றாக வாழமுடியும் வயசான காலத்தில் வேலை ஏதும் செய்யாமால் ஹாய்யாக இருக்கலாம். ஆனால் அமெரிக்க வாழ்க்கையில் சேமிப்பது என்பது மிக அதிகம் இருக்க வாய்ப்பில்லை அது மட்டுமல்லாமல் வயதானலும் நாம் உழைக்க வேண்டிருக்கும்.. இங்கு வாழ்வதற்கு மட்டுமல்ல நாம் செத்தால் அதற்கு ஏற்படும் செலவுகளுக்காகவும் நாமே சம்பாத்தித்து வைக்க வேண்டும்.

பார்த்து ரசிக்க பெருமை பட ஒரு விடியோ

இன்னும் வரும் ........ நிறைய வரும்...

நண்பர்களே இது என்னுடைய வாழ்வில் பார்த்தது கேட்டது அறிந்தது அனுபவித்ததும் ஆகும், நபருக்கு நபர் வாழும் இடத்திற்கு ஏற்ப அனுபவங்களும் மாறுபடும் இந்த பதிவிற்கு நிறைய பேர் ஆதரவு தந்து இன்னும் நிறைய எழுத வேண்டும் என்று எனக்கு இமெயிலில் தெரிவித்து இருக்கிறார்கள் அவர்கள் மிக அதிகம் எதிர் பார்க்கின்றனர். அவர்கள் எதிர்பார்பை என்னால் முடிந்த அளவில் நிறைவேற்றுகிறேன். ஆனால் நான் ஒன்ரு சொல்ல விரும்புகிறேன். நான் எழுத்தாளனும் அல்ல அறிவு ஜீவியும் அல்ல. அதனால் மிக அதிகம் எதிர்பார்க்காதீர்கள்

அன்புடன்

மதுரைத்தமிழன்

டிஸ்கி: உங்கள் கருத்துகளை மறக்காமல் பதிந்து உங்கள் (Foot Prints )தடத்தை இங்கே விட்டுச் செல்லுங்கள்