நல்லவர்களைத் தேடும் உலகில் ...நல்லவனாக இருக்க யாரும் முயற்சிப்பதில்லை

 

 

நல்லவர்களைத் தேடும் உலகில் ...நல்லவனாக இருக்க யாரும் முயற்சிப்பதில்லை





இந்தக் காலத்தில் யார் நல்லவர் கெட்டவர் என்பதை அறிந்து கொள்வது என்பது மிக எளிதான செயல் அல்ல. நல்லவர் போலத் தோற்றமளிப்பவர் நல்லவரும் அல்லர் அது போலக் கெட்டவர் போல் தோற்றமளிப்பவரும் பேர் கெட்டவரும் அல்லர்.

ஒரு குழந்தை பிறக்கும்போது, நல்ல மனத்துடனும் தூய சிந்தனையுடனும்  உண்மை, நேர்மை, ஒழுக்கம் எனும் நன்னடத்தைகளை அணிகலன்களாகக் கொண்டுதான் பிறக்கிறது. பல பெரியவர்கள் இப்படிச் சொல்ல நாமும் கேட்டு இருப்போம். ஆனால் இதில் நான் முரண்படுகின்றேன். பிறந்த குழந்தைகள் எழுதப்படாத நோட் புத்தகங்களாகவே இருக்கின்றன. அதைப் பயன்படுத்தி நாம் எப்படி எழுத ஆரம்பிக்கிறோமோ அப்படித்தான் அந்தக் குழந்தைகளும் மாறுகின்றன. அதை விட்டு விட்டு உண்மை, நேர்மை, ஒழுக்கம் எனும் நன்னடத்தைகளை அணிகலன்களாகக் கொண்டுதான் பிறக்கிறது என்று சொல்வது சரியல்ல. காரணம் இதற்கு அர்த்தம் என்னவென்பதுகூட அவர்களுக்குக் கொஞ்சம் கூடத் தெரியாது
 

வளரும் குழந்தைகள் வீட்டில் பெற்றோர்கள் பாட்டி தாத்தா மற்றும் உறவினர்கள் வளர்ப்பிலும் பள்ளியில் ஆசிரியர்கள் கற்றுத்தரும் முறையிலும் கூ சேர்ந்த நண்பர்களின் செயல்பாடுகளிலும், வெளியில் சமுதாயச் சூழ்நிலைகளாலும் வளர்ந்து நல்லவனாகவோ, கெட்டவனாகவோ மாறி குடும்பத்திற்கும் நம்மைச் சுற்றியுள்ள சமுதாயத்திற்கு நல்லதையோ, கெட்டதையோ செய்து கொண்டு இருக்கிறார்கள்.


இந்த உலகத்தில் நாம் நுழையும் போது நல்லவராகத் தான் வருகிறோம். அடிப்படையில் அனைவரும் நல்லவர்களாக இருந்தாலும், சமுதாயச் சூழலால் தீயவர்களாக மாறி, கெட்டவர் என்ற முத்திரையுடன் வெளியேறுகிறோம்.நிலை இப்படி இருக்கப் பலர் ஒருவரின் தோற்றத்தைக் கண்டு அல்லது அவர்களின் செல்வத்தைக் கண்டு அதாவது ஒருவர் முக அழகுடனும், எடுப்பான விலை உயர்ந்த உடை அணிந்திருந்தாலோ அவரை நல்லவர் என்றோ அல்லது கரடு முரடான முகத்துடன் விகாரமாக அழுக்கான உடை அணிந்திருந்தால் அவரைக் கெட்டவர் என்றோ முடிவுக்கு வந்து விடுகின்றனர்.... இது எவ்வளவு தவறு இன்று அவர்களுக்குக் காலம்தான் உணர்த்தும்

நாம் தினசரி வாழக்கையில் எத்தனை பேர்களைச் சந்திக்கிறோம் அப்படிச் சந்திக்கும் நபர்கள் சந்தணம் குங்குமம், பட்டை அல்லது நாமம் தரித்தோ அல்லது நன்றாகத் தாடி வளர்த்துத் தலையில் குல்லா அணிந்து பார்க்கப் பெரிய மனிதர்களாக வலம் வரும் அவர்களின் தோற்றங்களைப் பார்க்கும் போது நமக்கு அவர்கள் நல்லவர்களாகத் தோற்றமளிக்கிறார்கள்.. ஆனால் அவர்கள் தான் பல துறைகளிலும் அரசுத் துறை மற்றும் எந்தவொரு துறையிலும் லஞ்ச லாவண்யத்தில் இறங்கி வேலை செய்கிறார்கள் இதைக் கடை நிலை தொழிலாளியிலிருந்து தலைமைச் செயலர் வரை இதே கதைதான்.... ஆனால் இவ்ரளைத்தான் நாம் நல்லவர்கள் என்றும் கருதுகிறோம் இவர்களுக்கும் ரெள்டிகளாக இருந்து தவறனான வகையில் பொருள் சேர்ப்பவர்களுக்கு எந்தவித வேறுபாடுகளும் இல்லை.


ஆனால் அதே நேரத்தில் தினசரி கூலி வேலை பார்த்து சம்பாதித்து வாழ்க்கை நடத்தும் பலரை அவர்கள் தோற்றங்களைப் பார்த்தவுடன் அதிலும் அவர்கள் யாரையும் ஏமாற்றாமல் சொந்தக் காசில் குடித்து விட்டு வந்தால் அவர்கள் கெட்டவர்களாக நோக்குகிறோம். குடிப்பது தவறு இல்லை ஆனால் சந்தணம் குங்குமம் நெற்றியில் அணிந்து வெள்ளை வேட்டி சர்ட் போட்டு அடுத்துக் குடும்பங்களை நயவஞ்சகமாக அழிப்பவர்களைத்தான் நாம் நல்லவர்கள் என்றும் கருதிப் பழகுகிறோம் காரணம் அவர்களிடம் செல்வம் இருப்பதால்


ஒருவருக்கு நல்லவராக இருப்பவர் மற்றவருக்குக் கெட்டவராக இருப்பார். அதாவது, அவர் உதவி தேவைப்படும் ஒருவருக்குச் சாதகமான பணியைச் செய்தால் அவர் நல்லவர் ஆனால் அதை எதிர்த்தாலோ மறுத்தாலோ அவர் கெட்டவர். இது தான் இன்றைய சமுதாயத்தின் கண்ணோட்டம். இதை வைத்துப் பார்க்கும் போது மக்கள் நல்லவர்களைத் தேடவில்லை தமக்கு உதபுவர்களை மட்டுமே நல்லவர்களைத் தேடுவது மாதிரி போலித்தனமாகத் தேடிக் கொண்டிருக்கிறார்கள்.


மக்கள் பொதுவாக நயவஞ்சகர்களிடம் நட்பாக இருந்து கொண்டு போலித்தனமாக நல்லவர்களைத் தேடிக் கொண்டே இருக்கிறார்கள் . இப்படிப்பட்ட மக்கள்தான் நல்லதைக் குழி தோண்டி புதைத்த நாகரீக வாழ்க்கையை வாழ்ந்து கொண்டு நல்லதைப் பேசுவது போலக் கெட்டதை மட்டும் கற்றுத்தரும் மக்களாகச் சமுதாயமாக இருக்கின்றது.


இறுதியாக எல்லோரும் நல்லவர்களுடன் பழக வேண்டும் அவர்களுடன் ஏதாவது ஒரு வகையில் உறவுகள் ஏற்படுத்திக் கொள்ள வேண்டும் என்று நினைக்கிறார்களே தவிர அவர்கள் நல்லவர்களாக இருக்க முயற்சிப்பதில்லை

அன்புடன்
மதுரைத்தமிழன்


தன்னை உயர்த்திக் காட்டிக்கொள்ளக் கெட்டவர்களைத் தேடி உருவாக்கும் நல்லவர்கள் நிறைந்த உலகம்

வயதானவர்களை கேலி செய்யும் மனப்பான்மை அதிகரித்து வருகிறதா?  


ஆறறிவு பெற்ற மனிதர்களை விட ஐந்து அறிவு பெற்ற மிருகங்கள் வாழ்க்கை சிறப்பாக இருக்கிறதோ?