உடலுக்கு பலத்தை தரும் உளுந்து சாதம் செய்வது எப்படி

பருவப் பெண்கள் சாப்பிடச் சுவையான  சத்தான உணவு ( ஆண்களும் சாப்பிடலாம் )

சிறுவயதில் அம்மா தனியாகக் கஷ்டப்பட்டுச் சமைப்பார்கள் அந்த சமயங்களில் அம்மாவிற்கு உதவியாக எடுபிடியாக உதவிகள் செய்வதுண்டு. அப்படிச் செய்யும் போது கண்ணால் பார்த்து கற்றுக் கொண்டதுதான் என் சமையல். ஒரு சமயம் அம்மா உடல் நிலை சரியில்லாததால் ஹாஸ்பிடலில் இரண்டு வாரம் அட்மிட் பண்ணியதால் அந்த நேரத்தில் ஹோட்டலில் வாங்கி சாப்பிட தொடங்கினோம் எத்தனை வேளைதான் ஒட்டலில் சாப்பிடுவது பணமும் கரையத் தொடங்கியது. அதனால் நானே சமைக்கிறேன் என்று சமைக்க ஆரம்பித்தேன் அப்போது எனக்கு வயது 13 அல்லது 14 இருக்கும். அப்படி ஆரம்பித்ததுதான் என் சமையல் அனுபவம்.. அம்மாவிற்கு உதவி செய்ததால் பல விசயங்கள் ஞாபகத்திற்கு வந்து அதன்படியே செய்ய ஆரம்பித்தேன் வீட்டில் உள்ள எல்லோருக்கும் என் சமையல் பிடித்து விட்டது

 

அப்படி நான் கற்ற சமையலிலிருந்து  இன்று உங்களுக்காக ஒரு சமையல். அதுதான் உளுந்து சாதமும் மீன் குழம்பும். இந்த உணவு பருவ வயதில் இருக்கும் பெண்களுக்கு மிகவும் நல்லது. என் வீட்டுக்கு அருகில் உள்ள சிறு பெண்கள் வயசுக்கு வரும் போது என் அம்மா அவர்களுக்கு உளுந்து சாதம், உளுந்த வடை, உளுந்து களி என்று ஒவ்வொரு நாளும்  செய்து கொடுப்பார்கள். இப்படி பக்கத்து வீட்டுக்காரர்களுடன் சாதி மதம் பாராமல் பழகி வந்ததது அந்தகாலம் .

உளுந்து சாதமும் மீன் குழம்பும் செய்யும் முறையைப் பார்க்கும்  முன் அதனால் கிடைக்கும் பயன் கள் என்ன வென்று பார்ப்போம்

உளுந்து சாப்பிட்டால்  மருந்து வேண்டாம் என்று சொல்லுவார்கள். அதனால் உளுந்தால் தாயரிக்கப்படும் உணவைச் சாப்பிடுவதால்  நரம்பு மண்டலம் வலிமை பெறும் உடல் குளிர்ச்சிக்கும், நோய் எதிர்ப்பு சக்தியை அதிகரிக்கவும் உளுந்து நல்ல ஒரு உணவு. அதுமட்டுமில்லாமல் பெண்களின் மாதவிடாய் கோளாறுகள் நீங்கவும் பெண்களின் இடுப்பு வலிமை பெறவும் பக்கபலமா இருக்கிறது குழந்தை பெற்ற பெண்ணுக்குப் பால் சுரப்பை அதிகமாக்குகிறது. தினமும் நாம உளுந்த உணவில் சேர்த்தா மலச்சிக்கல், வயிறு உப்புசம் மாதிரியான பிரச்சனையெல்லாம் தீரும். அப்புறம்… இரத்தத்துல கொலஸ்ட்ரால் அளவை குறைத்து இதயத்தை பலப்படுத்துதும் உளுந்தை காயவைத்து அப்படியே அரைத்து அதனுடன் தேன் கலந்து சாப்பிட்டுவந்தால் தாது விருத்தியாகும். நரம்புகளும் புத்துணர்வு பெறும்.

இப்போது மதுரைத்தமிழன் பாணியில் உளுந்து சாதம் செய்வது எப்படி?

2 கப் ரைஸ்

1 கப் உளுந்து

3 அல்லது 4 பச்சை மிளகாய்

3 அல்லது 4 உரித்த வெள்ளைப்பூண்டு

 ஒரு ஸ்பூன் மிளகு தூள் (கொர கொர என்று இருக்கவேண்டும் ) அல்லது முழு மிளகைப் பயன்படுத்தலாம்

தேவையான அளவு உப்பு.

இவை எல்லாவற்றையும் குக்கரில் போட்டு மூன்று விசில் வந்ததும் இறக்கி  அதை மிக்ஸ் செய்யவும் எனக்கு இந்த சாதம் சற்று அதிகமாகக் குழைந்து இருக்க வேண்டும் என்பதால் மேலும் சில விசில் சத்தம் வரும் வரை காத்து இருந்து இறக்குவேன்.

இந்த சாதத்திற்குத் தொட்டுக் கொள்ள மீன் குழம்பு அல்லது கருவாட்டுக் குழம்பு அல்லது எள்ளு துவையல் அல்லது புளிக் குழம்பு மிகவும் நன்றாக இருக்கும்.

எனது அடுத்த பதிவில்  சுவையான மேல் சொன்ன குழம்பு வகைகளை வெஜ் மற்றும் நான் வெஜ் காரர்களுக்காகத் தருகிறேன்.

என்னடா தீடிர் என்று இந்த மதுரைத்தமிழன்  இந்த பதிவைப் போடுகிறான் என்று நினைப்பவர்களுக்கு. குழந்தைக்கு ஸ்பிரிங்க்  விடுமுறை விட்டு இருப்பதால் மாமி அலுவலகத்துக்கு போனவுடன் அவளுக்குத் தெரியாமல் இந்த மீன் குழம்பு பண்ணி உளுந்து சாதம் பண்ணினேன். மாமி ஈவினிங்க் வீட்டுக்கு வந்து பார்த்தால் இப்படிச் சமைத்த தடமே இல்லாமல் சாப்பீட்டுவிட்டு மீதி இருப்பவற்றை காராஜ்ஜில்  உள்ள ப்ரிட்ஜில்  ஒழித்து வைத்து விட்டோம்

அதிரா ஏஞ்சல் கீதா நிஷா உங்களுக்கு மாமியிடம் இதைச் சொல்லவில்லை என்றால் மண்டை உடைந்துவிடும் என்று எனக்கு தெரியும் ஆனால் நீங்கள் சொன்னால் என் மண்டை உடைந்துவிடும்... நல்ல வேளை மாமியின் போன் நம்பரை உங்களுக்குத் தராததால் எவ்வளவு நன்மைகள் ஈஹீஹீ

அன்புடன்

மதுரைத்தமிழன்