வலைத்தளத்தில் கலக்கும் தமிழ் பெண் பதிவர்கள்

வலைத்தளத்தில் கலக்கும் தமிழ் பெண் பதிவர்கள்

மரியாதைக்குரிய முத்து நிலவன் ஒரு தொடர் பதிவை ஆரம்பித்து வைத்து அதில் பல பதிவர்களை அறிமுகம் செய்து. வைத்து இதுபோல நீங்களும் பல பதிவர்களை அறிமுகப்படுத்துங்கள் என்று சொல்லி சிலருக்கு வேண்டுகோள் விடுவித்தார்...அப்படி அவர் வேண்டுகோள்விடுவித்தவர்களில் ஒருவர் நிஷா. அவர் சும்மா இருக்காமல் அதில் என்னையும் இழுத்து விட்டிருந்தார்.

அவரின் அந்த பதிவிற்கு வழக்கம் போல கிண்டலாக ஒரு கருத்தை போட்டு அப்படியே எஸ்கேப் ஆகிடலாம் என நினைத்திருந்தால் அடிக்காத குறையாக பதிவு போட சொன்னார் கமெண்ட் மட்டும் போட்டு போறியே என்று பேட்டை ரவுடி போல மிரட்டி சென்றார். அவர் மிரட்ட்லுக்கு பயந்த நான் கொஞ்சம் அவகாசம் கொடுங்கள் என்று கேட்டுக் கொண்டேன்.

என் ராசி என்னவோ மனைவிகிட்ட மட்டுமில்ல அம்மாவாக தோழிகளாக சகோதரிகளாக பிள்ளைகளாக என்னிடம் பழகும் அனைவரும் உரிமையோட அடிக்கதான் நினைக்கிறார்கள் ...

அப்படி அம்மாவாக தோழிகளாக சகோதரிகளாக பிள்ளைகளாக பழகும் நான் தொடரும் பெண் பதிவர்களை இன்று மகளிர் தினம் என்பதால் இங்கு நான் அறிமுகப்படுத்துகிறேன்.

1. ஜோஸபின் பாபா:  தன்னை சுற்றி நடக்கும் சமுக விஷயங்களை நம் கண் முன்னால் தமது எழுத்தால் அப்படியே காட்டும் திறமை இவருக்கு இருக்கிறது, இவரின் எழுத்து நடைதான் எனக்கு மிகவும் பிடித்தது. தெளிவாக சொல்ல வந்த விஷயங்களை கூட்டி குறைத்து சொல்லாமல் மிக எளிமையான நடையில் சொல்லிச் செல்லும் பாங்கு... வாய்ப்பு கிடைத்தால் சிறந்த ஜர்னலிஸ்டாக வரும் திறமை இருக்கிறது. இவரது கணவர் கடந்த மாதம் ஆக்ஸிடென்டில் இறந்து போனார். இவரை பற்றி இப்போது உள்ள பல பதிவர்களுக்கு தெரியவில்லை என்பதுதான் எனக்கு ஆச்சிரியம் அளிக்கிறது.முடிந்தால் இவரது தளத்திற்கு சென்று இவருக்கு ஆதரவு கொடுத்து ஆறுதல் தாருங்கள்

2. உஷா அன்பரசு : இவர் சிறந்த கதை கவிதை கட்டுரைகள் எழுதும் சிறந்த எழுத்தாளர், இவரது படைப்புகளை தினமலர்-பெண்கள்மலர், வாரமலர் ,பாக்யா.தேவதை.காலைக்கதிர்,ராணி,கல்கி,தங்கமங்கை போன்ற வார இதழ்களிலும் வெளிவந்தது & வந்தும் கொண்டிருக்கிறது. இவரது கதைகள் வள வளா கொள கொளா என்று இருக்காது. மிக அடக்கமான பெண்மணி.பதிவர் பலருக்கும் இவரை தெரியும். இப்போது இவர் தளத்தில் பதிவுகள் வருவது குறைந்து போய்விட்டது. ஒரு வேளை இதை படித்துவிட்டு நல்ல எழுத்துக்களை படிக்க நினைப்பவர்கள் ஆதரவு கொடுத்தால் மீண்டும் நிறைய படைப்புகளை படைக்க வாய்ப்புண்டு.

3. மைதிலி. இவரும் ஒரு சிறந்த படைப்பாளி. இவர் ஒரு பெண்ணாகவும் டீச்சராகவும் பொறுப்புள்ள குடும்பதலைவியாகவும் இருப்பதால் மிக அடக்கி வாசிக்கிறார். அரசியல் பதிவுகளுக்கு ஒரு பெண்மணி தைரியமாக கருத்து சொல்லுகிறார் என்றால் அது இவராகத்தான் இருக்கும் இவர் எல்லாம் மூழுவிச்சில் எழுத ஆரம்பித்தால் என்னை போல உள்ளவர்கள் மட்டுமல்ல பிரபலமானவர்களும் துண்டைக்காணும் துணியைக்காணும் என்று ஒட வேண்டியதுதான்

4. கிரேஸ் : மென்பொருள் பொறியாளராகப் பணிபுரிந்து இப்பொழுது அமெரிக்காவில் குடும்பத்தலைவியாய் இருந்து கொண்டு கணவரை மட்டுமல்லாமல் தன் சிறுவயதில் காதல் கொண்ட தமிழை இன்னும் மறக்காமல் காதலித்து கொண்டு தமிழ் இலக்கியம் கதை கவிதை கட்டுரை என்று கலக்கி கொண்டிருக்கிறார். சங்க இலக்கியங்களை பாக்களால் வடிக்கும் இவர் கட்டுரைகளை எழுதும் போது ஏனோ தானோ என்று அந்த நேரத்திற்கு ஏற்ப எழுதாமல் தமிழில் படிப்பவர்கள் பயன் பெற வேண்டும் என்று முழு முயற்சி செய்து தன் நேரத்தையும் செலவழித்து பதிவுகள் எழுதி பதிவிட்டுக் கொண்டிருக்கிறார். இப்படி பிரபலமானவரை என் தளப்பக்கம் இழுக்க முயற்சி செய்கிறேன் அது மிக கடினமாகத்தான் இருக்கிறது .காரணம் நான் அரசியல் சார்ந்த பதிவுகள் பகிர்வதால் அது ஒன்றுக்கும் உபயோகமாகதா சாக்கடை என்று கருதுகிறார். இவரை போல உள்ளவர்களுக்காக கவிதை கதை எழுதலாம் என்று பார்த்தால் நமக்கு தமிழ் சரியாக வராது ஹும்ம்

5.  அகிலா புகழ் : இவர்களை நான் அறிமுகப்படுத்திதான்  இந்த இணைய உலகத்திற்கு தெரிய வேண்டிய அவசியமில்லை. இவர்களை அறிமுகப்படுத்துவதினால் இவர்களின் எழுத்தை நானும் படித்துவருகிறேன் என்ற பெருமைதான் எனக்கு..இவருக்குள் ஒரு எரிமலை கனன்று கொண்டிருக்கிறது ஆனால் அது வெடித்து சிதறாமல்  பக்குவமாக வார்தைகளால்  வந்து கொண்டிருக்கிறது. அது வெடித்து சிதறாமல் இருப்பதற்கு அவர் உறவுகளுக்கு ஒரு மரியாதையை கொடுத்து அது சிதைந்துவிடாமல் இருப்பதுதான் காரணம். இவரைப்பற்றி ஒரு வரியில் சொல்ல வேண்டுமென்றால் ஒரு புயல் பெண்ணாக மாறி அமைதி கொண்டிருக்கிறது எனலாம்

6. சாகம்பரி இவர் ஒரு பேராசிரியர்.. இவரின் எழுத்துகள் மிக அருமையாகவும் எளிமையாகவும் இருக்கும். குடும்ப சூழ்நிலை காரணமாக  எழுதுவதை நிறுத்திவிட்டார் போல

7. ராஜி  இவர் என்னை போல எழுத்தாளர் இல்லை . ஆனால் பல  செய்திகளை தகவல்களை கோவில் பற்றிய பயணப்பதிவுகளை மேலும் பல தகவல்களை சுவைபட சொல்லி செல்லுவார். இவர் தளத்தை அறியாதவர்கள் புதியவர்கள் யாராக இருந்தாலும் கண்டிப்பாக செல்லுங்கள். இவரிடம் அன்பாக பேசினால் அழகிய கைவேலைப்பாடுகளுடன் கூடிய சேலை இலவசமாக கிடைக்க வாய்ப்புக்கள் உண்டு.

8.  தென்றல் சசி. பலபேர் கவிதை எழுதுவார்கள் அதை பலமுறை படித்தால் கூட அவர்கள் என்ன சொல்ல வருகிறார்கள் என்பது கூட புரியாது. ஆனால் இவர் எழுதும் கிராமியப் பாணியில் எழுதும் கவிதைகள் மனதை கொள்ளை அடித்துவிடும். திறமை இருந்தும் நல்ல வாய்ப்புக்கள் கிடைக்காததால் பிரகாசிக்க முடியாமல் இருப்பவர்களில் இவரும்  ஒருவர்

9. சுமித்தா ரமேஷ் இணைய வானொலியில் ஆர்.ஜே இருக்கும் இவர் பதிவுகளை சுவைபட எழுதி வருகிறார். முக்கியமாக திருமாலைக்காண்போமா  என்ற ஆன்மிக இலக்கிய பதிவையும் எழுதிவருகிறார்

10.  அருணா செல்வம் பாண்டிச்சேரியில் பிறந்து பிரஞ்சு நாட்டில் வசித்து வந்தாலும் தமிழை மறக்காமல் கவிதைகளால் பிளந்துகட்டும் வல்லமை உடையவர்

11. கீதா. இவர் தன் நண்பருடன் இணைந்து பதிவுகளை வழங்கிவருகிறார். மிக நல்ல பதிவர். நல்ல சிந்தனை வளம் கொண்டவர். பண்பாளர். வலையுலக பெண்களிலேயே என்னை நேரில் சந்தித்த ஒருவர் இவர்தான் என்று சொல்லி வருகிறார். அவர் என்னை அல்ல என்னுடைய டூப்பைதான் சந்தித்து இருக்கிறார் என்றால் நம்பமாட்டேங்கிறார்..ஹீஹீ

12. பாலமகி இவரும் மிக அருமையான பதிவுகளை பதிந்து வருகிறார்

13. முகுந்தம்மா  எங்கள் ஊர்காரர் அமெரிக்காவில் வசித்து வருகிறார். அமெரிக்க நடப்புகளை பற்றி இவர் தளங்களில் அறிந்து கொள்ளலாம். யாரையும் காயப்படுத்தாமல் மிக நாசுவாக எழுதுவார்

14. ஆதிவெங்கட் இவரும் மிக அருமையான பதிவுகளை பதிந்து வருகிறார்

15.  ஆச்சி ஆச்சி இவரும் மிக அருமையான பதிவுகளை பதிந்து வருகிறார்

16.  மஞ்சுபாஷினி இவரும் மிக அருமையான பதிவுகளை பதிந்து வருகிறார்

17.  ஹுசைனம்மா  இஸ்லாமிய பெண்ணாக இருந்து கொண்டு பலருடன் மிக நட்பாக பழகிவருபவர். நல்ல பதிவுகளையும் பகிர்பவர்.

18, சுவாதி. இவர் பதிவுகளை சமீபத்தில்தான் படித்து வருகிறேன், அனைத்தும் அருமையாக இருக்கிறது. 28 புத்தகங்கள் இவர் வெளியிட்டு இருக்கிறார் என்று அறிந்த போது ஆச்சிரியத்தின் எல்லைக்கே போனேன்

19.  நிஷா. நீண்ட காலமாக பல இணையதளங்கில் எழுதி வருபவர் ஆனால் இப்போதுதான் தனக்கென்று ஒரு தளம் அமைத்து மிக அருமையாக பதிவுகளை எழுதிவருகிறார். என் அருகில் இவர் வசிக்கவில்லை அப்படி வசித்து இருந்தால் இந்நேரம் இவரிடம் அடிவாங்கி இருப்பேன்

இந்த பதிவு எழுத காரணமானவர் இவர்தான் அதனால் என்னை  இந்த பதிவிற்காக யாரவது திட்ட வேண்டுமென்றால் இவரை திட்டவும் பாராட்ட வேண்டுமென்றால் என்னை பாராட்டவும்

 குறைஒன்றுமில்லை லஷ்மி அம்மா. வலையுலகில் அம்மா என்று அன்போடு அழைக்கும் இவர் மிக அருமையான பதிவுகளை இட்டு வந்தார் . ஆனால் 2013 க்கு அப்புறம் இவர் என்னவானார் ஏன்  எழுதுவதில்லை என்பது தெரியாமல் மர்மாக இருக்கிறது, இவர் பதிவுகளை இட்ட போது ஆர்வமாக இவருக்கு கருத்துக்கள் சொன்ன அனைவரும் இவர் எழுதவில்லை என்றதும் அமைதியாகிவிட்டனர். இந்த பதிவை படித்துவிட்டு அவரோ அவர் குடும்பத்தினரோ அல்லது அவரை அறிந்த தொடர்பு கொள்ளும் எந்த பதிவரும் அவருக்கு என்ன ஆச்சு அவர் நலமுடன் இருக்கிறார் என்று சொன்னால் நான் மிக மகிழ்ச்சி கொள்வேன்

http://kaagidhapookal.blogspot.com/ ஏஞ்சலின்  http://nigalkalam.blogspot.com/ எழில்

இங்கு நான் தொடரும் பல பெண் பதிவர்களை அறிமுகப்படுத்தி இருக்கிறேன் நேரமின்மையால் சிலர் இதில் விடுபட்டு போயிருக்கலாம்.அதற்காக மன்னிக்கவும்

இங்கு நான் அறிமுகப்படுத்தி இருக்கும் பதிவர்கள் எல்லாம் தங்களுக்குள் ஒரு கட்டுபாட்டையும் வரைமுறைகளையும் வகுத்து கொண்டு எழுதிவருகிறார்கள். இவர்களுக்கு ஆண்களை போல கட்டுபாடு ஏதும் இல்லாமல் இருந்தால்  உலகில் மிகவும் புகழ் பெற்றவர்களின் லிஸ்டில் இவர்களின் பெயர்களும் வந்திருக்க கூடும் என்பது நிச்சயம்

அன்புடன்

மதுரைத்தமிழன்