ரெஸ்டராண்ட் ஸ்டைல் ஹோம் மேட் ஆனியன் ராவா தோசை செய்வது எப்படி?

ரெஸ்டராண்ட் ஸ்டைல் ஹோம் மேட் ஆனியன் ராவா தோசை செய்வது எப்படி?

ரவா தோசை பிடிக்காதவர்கள் அதிலும் ஆனியன் ரவா தோசை பிடிக்காதவர்கள் யாருமே இருக்கமாட்டார்கள் என நினைக்கிறேன். நாம் எந்த ஹோட்டலுக்கு சென்றாலும் என்ன ஆர்டர் பண்ணுவது, எதை சாப்பிடுவது என்று தெரியவில்லை என்றால் கண்ணை மூடிக் கொண்டு ஆர்டர் செய்வது ஆனியன் ரவா தோசைதான்.

ஆனியன் ரவா தோசை சுடுவது என்பது கம்ப சூத்திரம் அல்ல .அதை சுடுவது மிக மிக எளிது . அதிலும் வீட்டிற்கு தீடிரென்று விருந்தாளிகள் வந்துவிட்டால் என்ன செய்வது என்று தெரியாத நிலையில் மிகவும் கை கொடுப்பது இந்த தோசைதான். தோசை சுட்டு போடுவதற்குதான் டைம் எடுக்குமே தவிர அதை தயாரிக்க எடுக்கும் நேரம் 3 நிமிடங்கள் கூட ஆகாது.

இதோ உங்களுக்காக நான் சொல்லப் போகும் மிக எளிய முறை..

தேவையான பொருட்கள் :

ரவை  -  1 கப்

அரிசி மாவு 1 கப்

மைதா - 2 டீஸ்பூன்

சீரகம்  - 3 ஸ்பூன்

மிளகு தூள் 2 ஸ்பூன் (மிக நைஸாக இருக்க கூடாது அரைகுறையாக பொடித்தது )

பெருங்காயப்பவுடர்  டேஸ்டுக்காக

உப்பு தேவையான அளவு

வெங்காயம் 2 அல்லது 3 (பொடியா நறுக்கி கொள்ளவும்)

பச்சை மிளகாய் 5  ( பொடியாக நறுக்கி கொள்ளவும்)

எண்ணெய் தேவையான அளவு

முதலில் ரவை ,அரிசி மாவு, மைதா மாவு, சீரகம், மிளகு தூள், பெருங்காயபவுடர் இதை எல்லாம் ஒரு பாத்திரத்தில் போட்டு மிக்ஸ் செய்துவிட்டு அதன் பின் அதில் தண்ணீர் வீட்டு கரைக்கவும்.. அந்த கரைசல் எப்படி இருக்கவேண்டுமென்றால் நாம் மோர் கடைந்து வைப்பது போல மிக தண்ணிராக கரைத்து கொள்ளவும்.

அதன் பின் அடுப்பில் தோசைக்கல்லை போட்டு, கல் காய்ந்ததும் முதலில் கல்லில் பொடியாக நறுக்கி வைத்த வெங்காயம் மற்றும் பச்சை மிளகாயை அதில் தூவி, அதன் பின் கரைத்து வைத்த மாவை எடுத்து கல்லில் வீட்டு வாசலில் தண்ணிர் தெளிப்பது மாதிரி தெளிக்கவும் அல்லது கரண்டியால் சுற்றி ஊற்றவும். அதன் பின் அந்த தோசையை சுற்றி நன்றாக எண்ணெய் விட்டு தோசை நன்றாக முறுகலாக வந்ததும் எடுத்துவிடவும். திருப்பி போட வேண்டிய அவசியம் இல்லை.

வெளிநாட்டில் உள்ளவர்கள் தோசை கல்லு இல்லை என்றால் கவலைப்படவேண்டாம் பேன்கேக் செய்யும் நீண்ட எலக்ட்ரிக் கல்லில் போட்டு எடுக்கலாம்.. இந்த எலக்ட்ரிக் கல்லில் செய்தால் தோசை மிக நீளமாக ரெஸ்டரண்டில் செய்வது போல பார்ப்பதற்கு மிக அழகாக இருக்கும். இன்று நேரம்மில்லாததால் ரெகுலர் தோசைக் கல்லில் செய்து படம் போட்டு இருக்கிறேன்.

புதிதாக செய்பவர்களுக்கு தோசை ரவுண்டாக வரவில்லை அல்லது பிஞ்சு போய் வருகிரது என்று கவலைப்பட வேண்டாம். அப்படி பிஞ்சு வந்தாலும் இந்த முறையில் தோசை செய்தால் தோசை மிக டேஸ்டாக இருக்கும். எப்படியும் ரவுண்டாக வந்தாலும்கடைசியில்  பிய்த்து பிய்த்துதானே சாப்பிட போகிறோம்..

செஞ்சு பாருங்க... சுவைத்து மகிழுங்க....பதிவு பிடித்து இருந்தால் உங்கள் கருத்தை சொல்லிட்டு போகவும் இல்லையென்றாலும் சொல்லிட்டு போங்கள்

ஆனால் பார்த்துவிட்டு பேசாமல் போனால் நீங்கள் வைத்திருக்கும் செல்போன் அல்லது நகைகள் பறி போகும் வாய்ப்புக்கள் உள்ளது என்று என் உள் மனம் சொல்லுகிறது... ( ஹீஹீ எப்படியெல்லாம் இவங்களை மிரட்ட வேண்டி இருக்குது)

அன்புடன்

மதுரைத்தமிழன்