சு. வெங்கடேசன் சர்ச்சை பேச்சு: திமுக ஆட்சியில் கைகள் கட்டப்பட்டிருந்ததா அல்லது மனசாட்சியா? MP Su. Venkatesan's controversial remarks: Were hands tied or was it a matter of conscience during the DMK regime?

 
சு. வெங்கடேசன் சர்ச்சை பேச்சு: திமுக ஆட்சியில் கைகள்   கட்டப்பட்டிருந்ததா அல்லது மனசாட்சியா? MP.  Su. Venkatesan's controversial remarks: Were hands tied or was it a matter of conscience during the DMK regime?

   

#சு.வெங்கடேசன், இதுவரை உங்களை இடதுசாரி அரசியலின் நேர்மையான முகங்களில் ஒருவராகவே மதித்து வந்தேன். ஆனால் இன்று நீங்கள் பேசிய சில வார்த்தைகள், அந்த மதிப்பையே சிதறடித்துவிட்டன.

திமுக ஆட்சியில் அதிகாரிகளின்  கைகள் கட்டப்பட்டிருந்தன. இப்போது நேர்மையான அதிகாரிகளுக்கு பொற்காலம்  என்று கூறியிருக்கிறீர்கள்.

ஒரே ஒரு கேள்வி.

அதிகாரிகலின் கைகளை யார் கட்டினார்கள்?

அதைவிட முக்கியமான கேள்வி...

அந்தக் கைகளை அவிழ்க்க நீங்கள் எப்போது முயற்சி செய்தீர்கள்?

ஐந்து ஆண்டுகள் நாடாளுமன்ற உறுப்பினராக இருந்தீர்கள். மேடைகளில் பேசினீர்கள். நூல்கள் எழுதினீர்கள். சமூக நீதி குறித்து உரையாற்றினீர்கள். எல்லாம் சரி 

ஆனால், அதிகாரிகளின் கைகள் கட்டப்பட்டுள்ளன என்று ஒரு நாளாவது மக்களிடம் சொன்னீர்களா? 

இல்லை.

அப்படியென்றால் இன்று மட்டும் அந்த உண்மை எப்படி நினைவுக்கு வந்தது?அதிகாரம் மாறிய பிறகுதான் அந்தத் துணிச்சலும் வந்ததா?

கூட்டணி தர்மம் இருக்கலாம். ஆனால் கூட்டணி தர்மம் என்பது தவறை மௌனமாக ஏற்றுக்கொள்வதற்கான உரிமம் அல்ல. பொதுவெளியில் பேச விருப்பமில்லையென்றால், கூட்டணித் தலைவரிடம் உங்கள் எதிர்ப்பை பதிவு செய்தீர்களா? ஒரு கடிதமாவது எழுதினீர்களா? ஒரு அறிக்கையாவது வெளியிட்டீர்களா?ஒரு நாள் கூட, இதில் எனக்கு உடன்பாடு இல்லை என்று சொல்லியிருக்கிறீர்களா?

எதுவுமே இல்லை. ஆனால் இன்று மட்டும், அதிகாரிகளின் கைகள் கட்டப்பட்டிருந்தன  என்று சொல்கிறீர்கள்.

அரசியலில் பதவி என்பது மக்களுக்குச் சேவை செய்ய கிடைக்கும் வாய்ப்பு. அதிகாரத்தில் இருப்பவர்களுடன் அமைதியாகப் பயணிப்பதற்கான பரிசு அல்ல.ஒரு அரசு தவறு செய்கிறது என்று உங்களுக்குத் தெரிந்திருந்தால், அதை அப்போதே எதிர்ப்பதே உங்கள் கடமை.அதைச் செய்யாமல் மௌனமாக இருந்துவிட்டு, ஆட்சி மாறிய பிறகு உண்மையைப் பேசுவது துணிச்சல் அல்ல.அது பாதுகாப்பான அரசியல். அதற்கு இன்னொரு பெயர்... சந்தர்ப்பவாதம்.

#சு.வெங்கடேசன், நீங்கள் சொல்வது உண்மையென்றே வைத்துக் கொள்வோம். அப்படியானால் இன்னொரு கேள்வி. அப்போது விஜய் கூட்டணி அமைக்க அழைத்தபோது ஏன் செல்லவில்லை?

திமுக ஆட்சியில் எங்கள் கைகள் கட்டப்பட்டுள்ளன. அந்தக் கைகளை அவிழ்க்க புதிய அரசியல் தேவை என்று அப்போதே சொல்லியிருக்கலாமே?

அப்போது ஏன் மாற்று அரசியல் தேடவில்லை?ஏன் கூட்டணியை விட்டு வெளியேறவில்லை? ஏன் உங்கள் பதவியைப் பணயம் வைத்து எதிர்க்கவில்லை? அப்போது மௌனம்... இன்று வீரம்...இந்த மாற்றம் உங்கள் மனசாட்சியில் ஏற்பட்டதா? அல்லது ஆட்சியில் ஏற்பட்டதா?

நாடாளுமன்றத்தில் அதிகாரத்தைக் கேள்வி கேட்கும் துணிச்சல் கொண்ட ஒருவர், கூட்டணிக்குள் மட்டும் மௌனமாக இருந்தார் என்றால், உங்கள் கைகளை கட்டியிருந்தது திமுக அல்ல... பதவியின் வசதிதான்.

நீங்கள் இன்று திமுகவை விமர்சிக்கிறீர்கள். அது உங்கள் உரிமை.ஆனால் அந்த விமர்சனத்தை விடப் பெரிய கேள்வி ஒன்று எழுகிறது. நீங்கள் அறிந்த தவறுகளை, அவை நடந்துகொண்டிருந்தபோதே ஏன் சொல்லவில்லை?அந்தக் கேள்விக்கான பதில் இல்லாமல், இன்றைய நேர்மைப் பேச்சு முழுமையடையாது.

அரசியலில் இரண்டு வகையான மனிதர்கள் இருக்கிறார்கள். கொள்கைக்காக பதவியை இழப்பவர்கள். பதவிக்காக கொள்கையை இழப்பவர்கள். நீங்கள் எந்த வரிசையில் நிற்கிறீர்கள் என்பதை, இன்று உங்கள் பேச்சே மக்களுக்குச் சொல்லிவிட்டது.

கம்யூனிசம் என்பது அதிகாரத்திற்கு ஏற்ப நிறம் மாறும் சிந்தனை அல்ல. அது அதிகாரத்திற்கே எதிராகக் கேள்வி கேட்கும் துணிச்சலின் பெயர். அந்தத் துணிச்சல் ஆட்சி மாறிய பிறகுதான் வருகிறது என்றால், அது கம்யூனிசத்தின் வெற்றி அல்ல... அதன் தோல்வி.


நாளை மீண்டும் ஆட்சி மாறலாம். அன்றும் இதே வசனம்தானா?  அப்போதும் எங்கள் கைகள் கட்டப்பட்டிருந்தன... ஒவ்வொரு ஆட்சி மாறும்போதும் கைகள் மட்டும்தான் கட்டப்படுகிறதா?

இல்லை...  ஒவ்வொரு முறையும் மனசாட்சியும் சேர்த்தே கட்டப்பட்டிருக்கிறதா?

உங்கள் இன்றைய பேச்சு திமுகவைப் பற்றிய உண்மையை விட, கடந்த ஐந்து ஆண்டுகளாக உங்கள் மௌனத்தைப் பற்றிய உண்மையைத்தான் அதிகமாக வெளிச்சம் போட்டுக் காட்டுகிறது.

அதிகாரம் மாறிய பிறகுதான் பேசப்படும் உண்மை...உண்மையாக இருக்கலாம்.ஆனால் அது தாமதமான உண்மை. அந்தத் தாமதத்தின் விலையைச் செலுத்தியது மக்கள்.

#சு.வெங்கடேசன் இனிமேலாவது நேர்மையுடன் மனசாட்சியுடன் வாழ கற்றுக் கொள்ளுங்கள் 

டிஸ்கி: காலையில் இது பற்றிச் சிறிய கருத்தைப் ஃபேஸ்புக்கில் பதிவிட்ட பிறகு, வலைத்தளத்திற்காக ஒரு பதிவு எழுதினேன். வழக்கம்போல உணர்ச்சிவசப்பட்டுச் சில கடுமையான சொற்களைப் பயன்படுத்தியிருந்தேன். அப்போது என் நண்பர்கள் சொன்ன அறிவுரை நினைவுக்கு வந்தது. உணர்ச்சிவசப்பட்டு கடுமையான வார்த்தைகளைப் பயன்படுத்துகிறீர்கள். சில நேரங்களில் நேரடியான தனிமனிதத் தாக்குதல் உங்கள் பதிவுகளில் இருக்கிறது, அதைத் தவிர்த்துக் கவனித்து எழுதக் கூடாதா  என்று அவர்கள் பலமுறை கூறியிருந்தனர். அவர்கள் சொன்னது நினைவுக்கு வந்ததும், இன்று சற்று நேரம் அதிகம் கிடைத்த நிலையில், காலையில் எழுதியதை மாலை வரை யோசித்து மாற்றி எழுதியுள்ளேன். இது என் நலம் விரும்பிகளுக்குச் சிறு மகிழ்ச்சியைத் தரும் என நினைக்கிறேன்.

அன்புடன்,
மதுரைத்தமிழன்

#சுவெங்கடேசன் #திமுக #தவெக #அரசியல் #தமிழகஅரசியல் #அரசியல்சந்தர்ப்பவாதம் #மதுரைத்தமிழன் #அரசியல்விமர்சனம்