தலித் அமைச்சர்கள்: விஜய்யின் மாஸ்டர் பிளானா? மோடியின் காப்பியா?
அலங்கார நாற்காலிகளை வைத்துக்கொண்டு அதிகாரப் புரட்சி செய்துவிட்டதாக ஒரு மாயையை இங்கே சிலர் கட்டமைக்கத் தொடங்கியிருக்கிறார்கள். தாழ்த்தப்பட்ட சமூகத்தைச் சேர்ந்தவர்களுக்குத் தன் அமைச்சரவையில் இடமளித்துவிட்டதை ஏதோ உலக மகா சாதனை போலவும், இதுவரை யாருமே செய்யாத சமூக நீதியைத் தாங்கள்தான் நிலைநாட்டி விட்டது போலவும் முதலமைச்சர் விஜய்யின் கட்சியினர் வலைத்தளங்களில் மார்தட்டிக் கொள்கிறார்கள்.
இதைச் சற்று உற்று நோக்கினால், டெல்லியில் மோடி போட்ட அதே பழைய கணக்குத்தான் இங்கு நினைவுக்கு வருகிறது. பழங்குடிச் சமூகத்தைச் சேர்ந்த திரௌபதி முர்மு அவர்களை நாட்டின் ஜனாதிபதியாக ஆக்கிவிட்டு, ஒட்டுமொத்த விளிம்புநிலை மக்களின் வாழ்வாதாரத்தையும் உயர்த்திவிட்டதாக பிஜேபி எப்படி ஒரு நாடகத்தை அரங்கேற்றியதோ, அதே வித்தையைத்தான் இப்போது விஜய்யும் கையில் எடுத்திருக்கிறார். மணிப்பூரில் நம் சகோதரிகள் வீதியில் நிர்வாணமாக இழுத்துச் செல்லப்பட்டபோது, அந்த உயர்ந்த நாற்காலியால் ஒரு கண்டனக் குரலைக்கூடப் பதிவு செய்ய முடியவில்லை. புதிய நாடாளுமன்றத் திறப்பு விழாவில் அந்த முதல் குடிமகளுக்கு அழைப்பில்கூட இடமில்லை. ஆக, இந்த அலங்காரப் பதவிகள் என்பது ஒரு சமூகத்தின் கண்ணீரைத் துடைக்கப் பயன்படாத வெறும் காட்சிப் பொருளைத் தவிர வேறென்ன?
இன்று விஜய் கொடுத்திருக்கும் அமைச்சர் பதவிகளும் முர்முவின் ஜனாதிபதி நாற்காலியும் ஒன்றுதான். ஒரு சமூகத்தை உண்மையாக உயர்த்துவது என்பது அவர்களுக்குக் கல்வியிலும் பொருளாதாரத்திலும் என்னென்ன திட்டங்களை வகுத்துச் செயல்படுத்துகிறோம் என்பதில்தான் அடங்கியிருக்கிறதே தவிர, அதிகாரப் பதவிகளில் சிலரை உட்கார வைப்பதில் இல்லை. ஒடுக்கப்பட்ட மக்களின் சேரிகளில் இன்றும் தொடரும் இருளை விலக்க, தீண்டாமைச் சுவர்களை வேரோடு சாய்க்க, அவர்களின் வாழ்வாதாரத்தை உயர்த்த இந்த அரசிடம் என்ன ஆக்கபூர்வமான திட்டங்கள் இருக்கின்றன என்பதை முதலில் சொல்லுங்கள்.
இன்றும் தமிழ்நாட்டின் பல கிராமங்களில் இரட்டைக் குவளை முறையும், தலித் பஞ்சாயத்துத் தலைவர்கள் சுதந்திரமாக தேசியக் கொடி ஏற்ற முடியாத அவலமும் தொடர்கிறதே, அதை இரும்புக்கரம் கொண்டு ஒடுக்க உங்கள் அரசு என்ன அதிரடிச் சட்டம் கொண்டுவரப் போகிறது? அதை விடுத்து, நாற்காலி கொடுத்துவிட்டேன் என்று பெருமை பேசுவது பசியால் துடிப்பவனுக்குப் பட்டு வேட்டி கட்டி அழகு பார்ப்பதற்குச் சமம். திட்டங்கள் இல்லாத பதவிகளை வீசி எறிவது சமூக நீதி ஆகாது, அது எதற்கும் பிரயோஜனமில்லாத அப்பட்டமான வெற்று அரசியல்!
அதிகாரம் என்பது வெறும் அலங்காரப் பொருளாக இருக்கக் கூடாது; அது சமூக இருளைக் கிழிக்கும் ஆயுதமாக இருக்க வேண்டும். தாழ்த்தப்பட்ட மக்களைத் தூக்கிவிடத் திட்டங்களை வகுக்காமல், வெறும் பதவிகளை மட்டும் கொடுப்பது சமூக நீதி ஆகாது. முர்முக்களின் கண்ணீரைத் துடைக்காத நாற்காலிகள் எந்தக் காலத்திலும் சமூகத்தின் தலைவிதியை மாற்றுவதில்லை என்பதைப் புதிய அரசு புரிந்துகொண்டால் சரி.
டிஸ்கி : திருமாவளவன் பாஜக தமிழகத்தில் எந்த ரூபத்திலும் வந்துவிடக் கூடாது என்பதால் ஆதரவு தருகிறேன் என்பதில் எனக்கு எந்தவொரு ஆட்சேபணையும் இல்லை. அதற்கு மாற்றுக் கருத்தும் இல்லை.. ஆனால் ஆட்சி அதிகாரத்தில் பங்கு என்று வரும் போது தலித் மக்களின் நலனுக்காக இந்தந்த திட்டங்கள் கண்டிப்பாக கொண்டு வர வேண்டும். அப்படி இல்லையெனில் தவெகவிற்கு தரும் முழு ஆதரவையும் முழுமையாக விலக்கி கொள்வேன் என்று ஒரு ஓப்பந்தத்தை ஏற்படுத்தி அதில் கையெழுத்தும் இட வேண்டும். அப்படியில்லை என்றால் விசிகவும் மற்றையக் கட்சிகள் போலத்தான்
அன்புடன்
மதுரைத் தமிழன்
#சமூகநீதி #விஜய் #தவெக #தமிழகவெற்றிக்கழகம் #அதிகாரப்பகிர்வு #தமிழ்நாடுஅரசியல் #திருமாவளவன் #விசிக #பஞ்சமிநிலம் #தீண்டாமைஒழிப்பு #முர்மு #அரசியல்விமர்சனம் #உண்மைஅரசியல் #CMVijay #TVK #TamilNaduPolitics #SocialJustice #Thirumavalavan #VCK #DalitRights #AvargalUnmaigal
Posts
0 comments:
Post a Comment
நான் அறிவு ஜீவி அல்ல ஒரு சாதாரணமான் மனிதன் தான்.இங்கு நான் பதியும் பதிவுகளில் உள்ள கருத்துகள் "மிகவும் சரி"யென்று சொல்லமாட்டேன் அது அன்றைய மனநிலையில் என் மனதில் எழும் கருத்துகளே...அதனால் உங்களது மனசுலபட்ட மாற்று கருத்துகளை தாராளமாக பகிரலாம். ஆனால் தேவையற்ற, வரம்புமீரிய, அநாகரிகமான வார்த்தைகளாலும் பதிவிற்கு சம்பந்தமில்லாமல் கருத்துக்கள் சொல்லப்பட்டால் எந்த வித பதில் விளக்கமின்றி அந்த கருத்து டெலீட் செய்யப்படும்.