ஆறறிவு பெற்ற மனிதர்களை விட ஐந்து அறிவு பெற்ற மிருகங்கள் வாழ்க்கை சிறப்பாக இருக்கிறதோ?

 

ஆறறிவு பெற்ற மனிதர்களை விட ஐந்து அறிவு பெற்ற மிருகங்கள் வாழ்க்கை சிறப்பாக இருக்கிறதோ?


மனித இனத்தைச் சார்ந்த நாம் நமக்குத்தான் அறிவு இருக்கிறது அதனால்தான் நாம் சிந்தித்து அலசி ஆராய்ந்து எந்த விஷயத்தையும் சிறப்பாகச் செய்ய முடிகிறது என்று நினைத்துக் கொள்கிறோம். ஒரு வகையில் அது உண்மை என்றாலும் எல்லோரும் அப்படிச் செயல்படுவதில்லைதானே. அப்படி என்றால் எல்லா மனிதர்களையும் மனித இனத்தில் சேர்க்க முடியாதுதானே.


நான் பல சமயத்தில் இப்படி நினைத்துப் பார்ப்பேன். மனிதன் ஆறறிவு உள்ளவன் சிந்திப்பவன் என்றால் எல்லா விஷயங்களையும் சிந்தித்துத்தான் செயல்படுகின்றானா? இல்லை என்றால் ஏதோ குருட்டாம்போக்கில் வாழ்கின்றானா என்று?
 
உதாரணமாக ஒருவன் ஒரு மதத்தைப் பின்பற்றும் போது அதைச் சிந்தித்து யோசித்துத்தான் அந்த மதவழிபாட்டைப் பின் பற்றுகின்றானா அல்லது அவனது பெற்றோர்கள் வழிபடுவதால் அதுதான் சிறந்தது என்று எண்ணி அவனும் அதைப் பின்பற்றுகின்றானா என்று எனக்கு அடிக்கடி நினைக்கத் தோன்றுகிறது.. அவனது பெற்றோர்கள் பின்பற்றுவதால் அது சிறப்பானது என்றால் மற்ற விஷயங்களிலும் அவன் பெற்றோர்கள் பின்பற்றும் அல்லது சொல்லும் விஷயங்களை அப்படியே ஏற்றுக் கொள்ளாமல் அவர்களுக்கு ஒன்றுமே தெரியாது நமக்குத்தான் எல்லாம் தெரியும் என்று செயல்படுவதை என்னவென்று சொல்லுவது

எல்லோரும் அறிவாளிகளாக இருக்க முடியாதென்றால் அவர்கள் தேர்ந்தெடுத்துப் பின்பற்றும் மதங்கள் மட்டும் சரியானதா என்ன? ஆறறிவு படைத்த மனிதர்கள் தங்கள் குழந்தைகளுக்கு எல்லா மதங்களையும் பற்றிப் படிக்கச் செய்து அதில் தன் குழந்தைகளுக்கு எந்த மதம் பிடிக்கிறதோ அல்லது அவர்களின் அறிவிற்குத் தெரிகிறதோ அதைப் பின்பற்ற வழி வகைகளை ஏற்படுத்தாமல் தான் பின்பற்றும் மதத்தைக் கண்மூடித்தனமாக ஏற்றுக் கொள்ளச் செய்வது ஏதனால்? கொஞ்சம் யோசித்துத்தான் பாருங்களேன்.


இன்று டிவிட்டரில் படித்த உண்மை சம்பவம் இதுதான் ஒரு பெண்மணி ஆசிரியாராகப் பணிபுரிந்து ரிட்டையர் ஆகியவர். தன் குடும்பநலனுக்காகக் கல்யாணம் செய்து கொள்ளாமல் அக்கா , தங்கை மற்றும் சகோதரிகளின் குடும்பத்திற்காகத் தன் வாழ்வைத் தியாகம் செய்தவர்.குடும்பத்தில் பாசம் அதிக வைத்தவர். ஆனால் என்ன சகோதரியின் பிள்ளைகளின் தேவைக்காகத் தன் சொந்த விட்டையும் விற்றுக் கொடுத்து அவர்களுக்காக வாழ்ந்தவர்... ஆனால் என்ன இப்ப அவர் அந்தக் குடும்பத்தினரால் புறக்கணிக்கப்பட்டுத் தன் ஓய்வூதியம் பணத்தைக் கொண்டு விடுதியில் வாழ்ந்து வந்த அவர் விடுதியின் வாடகை அதிகரித்த அளவிற்கு அவரின் ஓய்வூதியம் தொகை வளராததால் இப்போது அனாதை நிலையைத்தை தேடிக் கொண்டிருப்பதாக அறிந்தேன்.


என்னுடைய கேள்வி இதுதான் பலருக்கும் அறிவை கற்றுக் கொடுக்கும் ஆசிரியருக்கும் தன்னின் வருங்காலத்தைப் பற்றியும் இன்றைய சூழ்நிலையில் மனிதர்களின் மனங்கள் மாறிவருவதையும் அவரின் அறிவால் சிந்தித்துச் செயல்பட முடியவில்லை என்றால் அந்த ஆறாம் அறிவு இருந்து என்ன பயன்?

இப்போது ஐந்து அறிவு பெற்ற விலங்கினங்களைக் கவனியுங்கள். எந்தச் சிங்கமும் தனக்கு வயதாகிவிட்டது என்று தன் குட்டியிடம் சாப்பாடு கேட்பதில்லை.எந்த மாடும் படுத்துக் கொண்டு தன் கன்றிடம் தண்ணீரோ உணவோ கேட்பதில்லை. எந்தப் பூனையோ, நாயோ படுத்த படுக்கையாக இருந்து கொண்டும் மலம் கழிப்பதில்லை. மரணம் அடையும் நாள் வரை சுயமாகத் தன் வேலைகள் அனைத்தையும் செய்கின்றன.

ஆனால் ஆறறிவு படைத்த மனிதர்கள் மட்டும் தனக்கு வயதானால் நோய்வரும், இயலாமை வரும் என்று தெரிந்தும் அதற்கான ஏற்பாடுகளைச் செய்யாது கொள்ளாமல், அடுத்தவர்களை எதிர்பார்த்து வாழ ஆரம்பிக்கிறார்கள்.

அப்படியென்றால் ஆறறிவு பெற்ற மனிதர்களை விட ஐந்து அறிவு பெற்ற மிருகங்களின் வாழ்க்கை சிறப்பாகத்தான் இருக்கிறதுதானே

ஆறறிவு பெற்ற நாம் குழந்தைகளை வளர்க்கும் போது சுயநலத்துடன் வாழாதீர்கள் அது போலச் சுயநலத்துடன் வாழ கற்றுக் கொடுக்காதீர்கள். அவர்களுக்குப் பொது நலன்களை அறிய மற்றும் செய்யக் கற்றுக் கொடுப்பதோடு நீங்களும் பொதுநலனுக்காக ஏதாவது செய்யுங்கள் அப்படி நீங்கள் செய்யும் போதுதான் அவர்களும் உங்களைப் பார்த்து கற்றுக் கொள்வார்கள் செயல்படுத்துவார்கள்... அப்படி வளரும் குழந்தைகள் மட்டுமே வருங்காலத்தில் தன் சுயநலத்தை மட்டும் சிந்திக்காமல் தன்னை வளர்த்த உறவுகளுக்கும் சமுகத்திற்கும் உதவி வாழ்வான் அப்படிச் செய்வதுதான் ஆறறிவு படைத்தவர்கள் செய்யும் செயல்.. அப்படி இல்லையென்றால் அவர்கள் ஐந்தறிவு பெற்ற விலங்கினத்தைவிடக் கீழானவர்கள்தான்


ஆறு அறிவு என்றால் என்ன என்பதைத் தொல்காப்பியம் இப்படிச் சொல்லுகிறது என்பதை அறிந்தேன் அதை என்னவென்பதை அறியாதவர்கள் அறியக் கீழே தருகின்றேன்..


புல்லும் மரமும் ஓர் அறிவினவே
நந்தும் முரளும் ஈர் அறிவினவே
சிதலும் எறும்பும் மூ அறிவினவே
நண்டும் தும்பியும் நான்கு அறிவினவே
மாவும் மாக்களும் ஐ அறிவினவே
மக்கள் தாமே ஆறு அறிவு உயிரே.


தொடு உணர்வு மட்டும் இருந்தால் ஓர் அறிவு
தொடு உணர்வும் சுவையும் அறிந்தால் ஈர் அறிவு.
தொடு உணர்வு, சுவை மற்றும் முகரும் அறிவு இருந்தால் மூன்று அறிவு
தொடு உணர்வு, சுவை, முகரும் அறிவு மற்றும் பார்வை இருந்தால் நான்கு அறிவு
தொடு உணர்வு, சுவை, முகரும் அறிவு, பார்வை மற்றும் கேட்கும் திறன் இருந்தால் ஐந்து அறிவு
இவற்றுடன் சிந்திக்கும் திறன் இருந்தால் ஆறறிவு


ஓரறிவு உயிர் என்பது என்ன? இவை தத்தம் உடலால் தொடுவதை மட்டும் அறியும். அதுதான் புல், மரம்.-
மெய்யுணர்வு

தொடு உணர்வோடு நாவினால் சுவையையும் அறிபவை ஈரறிவு உடையவை. அவையே முரள் மற்றும் நந்து. முரள் என்றால் அட்டை. நந்து என்றால் நத்தை.

கரையான் எறும்பு போன்றவை மூன்றறிவு உடையவை. இவை தொடு உணர்வு, சுவை மற்றும் முகரும் பண்பினையும் கொண்டவை. மோப்பம் பிடிக்கும். அதனால் தான் கரையான் புத்தகம் எங்கே இருந்தாலும் வந்து அரிக்கிறது.

நான்கு அறிவு உடையவை என்பவை பார்வையும் சேர்ந்து உடையவை. நண்டு தும்பி ஆகியவை இதற்கு உதாரணம்.

ஐந்து அறிவு உடையவை விலங்கினங்கள். ஐந்தாவது அறிவு என்பது ஒலி அறிதல்.

ஆறாம் அறிவு என்பது தான் மனத்தால் அறியும் அறிவு.

 

எனது முந்தையப் பதிவான வயதானவர்களை கேலி செய்யும் மனப்பான்மை அதிகரித்து வருகிறதா?    என்பதை படித்து அதற்கு தங்களின் பொன்னான நேரத்தை ஒதுக்கி சிறப்பாக கருத்துகள் இட்ட ரமணி சார், கில்லர்ஜி, தன்பாலன், ஸ்ரீராம் ,விசு மற்றும்  கோமதியம்மா அவர்களுக்கு எனது நன்றிகள்.
 


அன்புடன்
மதுரைத்தமிழன்