கரூர் கொலைக்களமும், ஓடி ஒளிந்த 'புதிய தலைவரும்'! அரசியலுக்குப் பிணம்தானே அடித்தளம்? -#சவக்குழி_அரசியல்

 கரூர் கொலைக்களமும், ஓடி ஒளிந்த 'புதிய தலைவரும்'! அரசியலுக்குப் பிணம்தானே அடித்தளம்?  -#சவக்குழி_அரசியல்

   

 கரூர் தேர்தல் பேரணியில் நடந்த துயரச் சம்பவம், தமிழ்நாட்டையே உலுக்கியுள்ளது. சுமார் 38 உயிர்கள், அதில் பல குழந்தைகள், பெண்கள் - ஒரு அரசியல் தலைவரின் கூட்ட நெரிசலில் நசுக்கப்பட்டு மடிந்திருப்பது, ஒரு மிகப் பெரிய அவமானம்! இது வெறும் விபத்து அல்ல, ஒரு அரசியல் கட்சியின் அடிப்படைப் பொறுப்பின்மை, மேலாண்மைத் திறனின்மை மற்றும் அலட்சியத்தால் நேர்ந்த படுகொலை!

இதுதான் உங்கள் 'வெற்றிக் கழகமா'?

நடிகர் விஜய்யின் ‘தமிழக வெற்றிக் கழகம்’ (TVK) தொடங்கிய சில மாதங்களிலேயே, அதன் முகத்தில் ரத்தக்கறை படிந்துள்ளது. அரசியல் களத்தில் கால் பதிக்கும் முன்னரே, 38 அப்பாவி உயிர்களின் பலியைச் சுமந்திருக்கும் இந்தக் கழகத்தை, 'வெற்றிக் கழகம்' என்று அழைப்பது நியாயமா?



திட்டமிட்ட தாமதம், திரட்டப்பட்ட கூட்டம்: கட்சித் தலைவர் விஜய் வருவதற்கு வேண்டுமென்றே பல மணி நேரம் தாமதப்படுத்தியதற்குக் காரணம் என்ன? கூட்டத்தின் எண்ணிக்கையை ஊதிப் பெரிதாக்கிக் காட்ட வேண்டும் என்ற சுயநலமா? காலை 9 மணியிலிருந்து காத்துக் கிடந்த மக்கள், தண்ணீர் கூட இல்லாமல் தவித்ததாகப் பலரும் வாக்குமூலம் அளித்துள்ளனர். விஜய் வந்து சேருவதற்கு முன்பே பலர் மயக்கம் அடைந்தனர். இது அப்பட்டமான மனித உரிமை மீறல்.


அலட்சியமும், அராஜகமும்:

 காவல்துறை மற்றும் நிர்வாகத்தின் விதிமுறைகளை மதிக்காமல், அனுமதிக்கப்பட்ட இடத்திலும் மக்கள் வெள்ளம் கட்டுப்பாடில்லாமல் நிரம்பி வழிந்ததற்கு யார் பொறுப்பு? கூட்டம் அலைமோதியபோது, மின்சாரம் துண்டிக்கப்பட்டவுடன், ஒரு குழந்தை காணாமல் போனதாக அறிவிப்பு வந்ததால் ஏற்பட்ட பதற்றம் நெரிசலுக்கு முக்கியக் காரணம் என்று உயிர் பிழைத்தவர்கள் கூறுகின்றனர். ஒரு கட்சியின் பொதுக்கூட்டத்தை ஒழுங்குபடுத்த முடியாவிட்டால், ஒரு மாநிலத்தை எப்படி ஆள முடியும்?



எங்கே தொண்டர் படை? - 38 உயிர்களை விழுங்கிய TVK-வின் 'கட்டுப்பாடற்ற' களப்பயிற்சி!

 காவல்துறை எவ்வளவுதான் பாதுகாப்பு கொடுக்க முடியும்? உங்கள் சினிமா ரசிகர் கூட்டத்தை மேய்க்கும் வேலையா அவர்களுக்கு? கட்சியின் நிர்வாகிகள்தான் கூட்டத்திற்குப் பொறுப்பு ஏற்க வேண்டும். கட்சிக்குத் தலைவனாக இருப்பது பெரிதல்ல. அப்படி இருந்தால் கட்சியில் பல தொண்டர் படை அணிகளை உருவாக்கி, அவைகளைக் கொண்டு பேரணியைக் கட்டுப்படுத்தும் அறிவு இருக்க வேண்டும். அண்ணா, பெரியார் போன்ற தலைவர்களின் படத்தைக் காண்பித்து உணர்ச்சிகரமாகப் பேசினால் மட்டும் போதாது. அவர்கள் சொன்ன கடமை, கண்ணியம், கட்டுப்பாட்டைக் கட்சியினருக்குச் சொல்லித் தந்திருக்க வேண்டும். ஒரு நல்ல தலைவன் என்றால், முதலில் இந்தக் கட்டுப்பாட்டைத்தான் தொண்டர்களுக்குக் கற்றுத் தந்திருப்பான். ஒழுங்கைக் கொண்டு வந்திருப்பான். பிறகுதான் கட்சியை ஆரம்பித்திருப்பான்! எவனோ பணம் தருவான், எவனோ எழுதித் தருவான் அதை மட்டும் பேசிவிட்டுத் தமிழக முதல்வராக வர ஆசைப்படுவது அவ்வளவு எளிதல்ல. உன் முதல் அடியே, 38 உயிர்களின் பிணத்தின் மீது விழுந்திருக்கிறது! இந்த அரசியல் அசுத்தத்தை மக்கள் சகித்துக் கொள்ளவே மாட்டார்கள்! 

உனக்குத் தேவை அரசியல் அல்ல; அரசியல் ஒழுக்கம்.



சுய விளம்பர வெறி: 

கூட்டம் முழுவதும் நெரிசலில் சிக்கி மக்கள் திணறும்போதும், 'ட்ரோன் ஷாட்' எடுக்க வேண்டிய அவசரம் என்ன? தலைவரின் சினிமா கவர்ச்சியை மட்டுமே நம்பி, ஒரு அடிப்படை அரசியல் பொதுக்கூட்டத்துக்கான பாதுகாப்பு ஏற்பாடுகளைச் செய்யத் தவறியது மன்னிக்க முடியாத குற்றம்.

போலீசாரின் லத்தி சார்ஜ்: 

நெரிசலில் மக்கள் தள்ளுமுள்ளு தொடங்கியபோது, போலீசார் தடியடி நடத்தியதாகவும், இது மேலும் குழப்பத்தை ஏற்படுத்தியதாகவும் சில eyewitness-கள் குற்றம் சாட்டுகின்றனர். இந்தக் குற்றச்சாட்டு உண்மையானால், இது அரசின் நிர்வாகத் தோல்வியைக் காட்டுகிறது.

தலைவர் எங்கே போனார்? நெரிசல் ஏற்பட்டு, மக்கள் உயிருக்குப் போராடும்போது, நடிகர் விஜய் தனது பேச்சை பாதியிலேயே முடித்துவிட்டு, திருச்சியிலிருந்து அவசர அவசரமாக சென்னைக்குத் திரும்பியது ஏன்? காயமடைந்தோரைச் சந்திக்காமல், தனது ரசிகர்களையும் தொண்டர்களையும் அனாதைகளாக விட்டுவிட்டுச் சென்றது எந்தவித அரசியல் தார்மீகத்தையும் கொண்டது? பிறகு, 'என் இதயம் நொறுங்கிவிட்டது, சொல்ல முடியாத துயரத்தில் தவிக்கிறேன்' என்று ஒரு ட்வீட் போட்டால் மட்டும் போதுமா?

விஜய் அவர்களே, அரசியல் என்பது சினிமா செட் அல்ல!

இந்த 38 உயிர்களின் மரணத்துக்கு நீங்களும், உங்கள் கட்சி நிர்வாகிகளும் நேரடியாகப் பொறுப்பல்லவா? உங்கள் சுயலாப அரசியல் ஆசையால், அப்பாவி மக்கள் பலியாயிருக்கிறார்கள். நீங்கள் இட்ட உத்தரவுகளும், கடைபிடிக்காத விதிமுறைகளும்தான் இந்த துயரத்தை ஏற்படுத்தியுள்ளன. உங்கள் முதல் அரசியல் அடியிலேயே, இத்தனை பேரின் சாவுக்குப் பொறுப்பேற்றுள்ளீர்கள்.

பொதுமக்கள் கூட்டம் என்பது கைதட்டி விசில் அடிக்கும் திரையரங்கமல்ல. அங்கு மக்கள் உயிர் வாழ்கிறார்கள், அவர்களுக்கும் குடும்பங்கள் உண்டு. நீங்கள் ஒரு பேச்சைப் பேச, உங்கள் சுயநல விளம்பரத்துக்காக, இத்தனை உயிர்கள் பலியானது வெட்கக்கேடானது!

நாட்டின் எதிர்காலத்தை கனவு காணும் ஒரு தலைவர், முதல் அடியிலேயே பிணங்களின் மீது நடக்கலாமா? நீங்கள் தமிழ்நாட்டுக்கு விடிவெள்ளியாக வரப் போகிறீர்களா அல்லது துயரங்களை மட்டுமே கொடுக்கப் போகிறீர்களா?

உடனடியாக இந்தக் கோரச் சம்பவத்துக்கு முழுப் பொறுப்பேற்று, பலியானவர்களின் குடும்பங்களுக்கு உண்மையான நீதி கிடைக்கவும், முழுமையான நிவாரணம் கிடைக்கவும் நடவடிக்கை எடுங்கள். ஒரு கமிஷன் விசாரணை போதாது! உங்கள் கட்சிக் காரர்கள் மீது கொலை வழக்குப் பதிவு செய்ய வேண்டும், அவர்கள் அப்பட்டமாக மனித உயிர்களை மதிக்கத் தவறிவிட்டனர்.

வெறுமனே இரங்கல் தெரிவித்துவிட்டுப் போவது, உங்கள் அரசியல் பயணத்தின் மீதான மக்களின் நம்பிக்கையை முற்றிலுமாக சிதைத்துவிடும்!

வெட்கம் கெட்ட கமெண்ட்டுகள்! விஷம் உமிழும் விரல்கள்! https://avargal-unmaigal.blogspot.com/2025/09/digitalparentingstopthehate-bekindonline.html

சூர்யாவின்  அகரம் பவுண்டேஷனுடன் போட்டியிடுகிறதா தமிழக அரசின் கல்வியில் சிறந்த தமிழ்நாடு நிகழ்வு??  https://avargal-unmaigal.blogspot.com/2025/09/kalviyilsirandhatntamilnadueducationmks.html

 

 

இந்தியா என்ற ஆலமரத்தை வெட்டிச் சாய்ப்பது யார்?

இந்தியாவின் மீது உண்மையான அக்கறை உள்ளவர்கள் வாசிக்க வேண்டியது இது https://avargal-unmaigal.blogspot.com/2025/09/blog-post_19.html

 

அடுத்த பத்தாண்டுகளில் அமெரிக்காவின் விண்வெளி ஆதிக்கத்தை முறியடிக்கப் போகும் சீனா! அமெரிக்காவிற்கு ஓர் எச்சரிக்கை  https://avargal-unmaigal.blogspot.com/2025/09/warning-to-america-today-america.html

மிக வேதனையுடன்
உங்கள் மதுரைத்தமிழன்

 

#VijayStampedeMassacre    ,#KarurTragedy    ,#AccountabilityNow,  #TVKFailure    , #JusticeFor38    , #NoMercyForNegligence