தளபதிக்கும் சாணக்கியருக்கும் தனியாக நிற்க பயம் ஏன்?

ஒரு பெண்மணியை எதிர்க்க தலைவரும் தளபதியும் அவசியமா என்ன? ஏன் தனியாக நிற்கும் தைரியம் இவர்கள் இருவருக்கும் இல்லாமல் போயிற்று? தேர்தலில் தனியாக நிற்கும் ஒரு பெண்மணியை எதிர்க்க இவர்களுக்கு மறுபடியும் ஏழு கட்சி கூட்டணி தேவைபடுகிறது.

ஜெயலலிதா அவர்களோ தன்னிடம் இருந்தவர்களை உதைக்காமல் உதறிவிட்டு தனியாக மோதி பார்க்கிறேன் என்று சவால் விட்டு செல்கிறார். அவரால் அவமானப்பட்டு உதறிவிடப்பட்ட கம்யூனிஸ்டுக்கள் ஜெயலலிதாவை எதிர்த்து பேசாமல் வாய்முடிதான் செல்கிறார்கள் அப்படி பட்டவர்கள் கூட தனியாக நின்று பார்ப்போம் என்றுதான் நினைக்கிறார்களே ஒழிய திமுக கூட்டணியில் சேர மறுக்கிறார்கள்.

அதே நேரத்தில் ஒரு தொகுதி பெற்ற காரணத்தினால் கோபம் கொண்ட திருமாவளவன் கட்சியினர் திமுக தலைவரின் கொடும்பாவியை எரித்து ஆர்பாட்டம் செய்ததால் அதற்கு பயந்து இன்னுமொரு சீட்டு கொடுத்து தன் கூட்டணியில் தக்க வைப்பது தான் தனியாக நின்றால் தோற்றுவிடுவோம் என்ற பயத்தினாலா என்ன?

திமுக ஆட்சியில் தமிழகத்தில் பொற்கால ஆட்சி போல நடந்தாக பில்டப் கொடுத்தும் பல வளர்ச்சி திட்டங்கள் ஏற்படுத்தியதாக மார்தட்டி கொண்டும் அதே நேரத்தில் அதிமுக ஆட்சியில் வளர்ச்சியே ஏதும் இல்லை அதிகார ஆட்சிதான் நடக்கிறது மக்கள் மிகவும் இந்த ஆட்சியை கண்டு மிக மனம் வெறுத்துள்ளனர் என்று சொல்லும் திமுக, தனியாக நிற்க பயபடுகிறது. அப்படி திமுகவினர் சொல்வது உண்மையாக இருந்தால் பயப்படுவது அதிமுக வாகத்தானே இருக்க வேண்டும்

எங்கள் கதவுகள் மூடப்பட்டுவிட்டன அதில் காங்கிரஸுக்கு இடம் இல்லை என்று சொன்னவர்கள் இப்போது 5 சீட்டு தருகிறேன் வேண்டுமானால் வந்து சேருங்கள் என்று வரவேற்பது எதனால்? நீங்கள் எந்த காரணத்தினால் காங்கிரஸை எதிர்த்து வெளியேறினிர்களோ அந்த காரணத்திற்கு அவர்கள் ஆதரவு தந்துவிட்டனரா? அல்லது ராஜீவ் கொலை வழக்கில் கைது செய்யபட்டவர்களை விடுதலை செய்கிறோம் என்று சொல்லிவிட்டனரா என்ன? இல்லை தமிழக் மீனவர்களுக்கு பாதுகாப்பு செய்து தருகிறோம் என்று சொல்லிவிட்டார்களா? அப்படி என்ன நல்ல காரியம் அவர்கள் செய்தார்கள். அவர்களுக்கு ஏன் உங்கள் கூட்டணியில் மீண்டும் வரவேற்பு? விஜயகாந்த் உங்கள் இருவருக்கும் அல்வா கொடுத்ததினால்தான் இந்த கூட்டணியா? எப்படியோ பிரிஞ்ச உங்களை விஜயகாந்த் இணைத்து வைத்துவிட்டார் அவர் மாற்றுக் கூட்டணிக்கு சென்றாலும். சரி இனி என்ன விஜயகாந்துதான் வரலைன்னு சொல்லிட்டாரு இல்ல. அப்ப எங்க அண்ணண் அழகிரியையும் உடன் சேர்த்து கொள்ள வேண்டியதுதானே?

அன்புடன்

மதுரைத்தமிழன்