மேடையில் பெரியார் முழக்கம் வீட்டில் வேத மந்திர முழக்கம்
மதுரைத்தமிழன்: வணக்கம் ஐயா! உங்க வீட்டுக் கல்யாணத்தைப் பற்றித்தான் ஊரெல்லாம் பேச்சா இருக்கே
துரைமுருகன்: கல்யாணம்னா நாலு பேர் பேசத்தான்ய்யா செய்வாங்க!
மதுரைத்தமிழன்: சாப்பாட்டைப் பற்றிப் பேசலைய்யா சடங்கைப் பற்றிப் பேசுறாங்க!
துரைமுருகன்: நீ சாப்பிட்டியா?
மதுரைத்தமிழன்: இல்லைய்யா.
துரைமுருகன்: அதான் கேள்வியெல்லாம் இவ்வளவு சூடா இருக்கு. முதல்ல ஒரு பாயசம் கொடுங்கப்பா இவருக்கு!
மதுரைத்தமிழன்: பேட்டியைப் பந்திக்கு மாத்தாதீங்க ஐயா! மேடையில பகுத்தறிவு வீட்டுல வைதீகம்னா கேள்வி வராதா?
துரைமுருகன்: வீட்டுல நாம மட்டும் இருக்கோமா? பிள்ளைங்க, பெரியவங்க, சம்பந்தி வீட்டுக்காரங்க எல்லாருக்கும் ஒரு விருப்பம் இருக்குமில்ல?
மதுரைத்தமிழன்: அப்போ கொள்கைக்கு?
துரைமுருகன்: அதையும் கூப்பிட்டிருந்தோம்.
மதுரைத்தமிழன்: வந்துச்சா?
துரைமுருகன்: வரவேற்பு மேடையில பேசிட்டு போயிடுச்சு!
மதுரைத்தமிழன்: ஓ கல்யாணத்துக்குக் குடும்ப விருப்பம். வரவேற்புக்குக் கொள்கை விளக்கமா?
துரைமுருகன்: எல்லாருக்கும் நேரம் ஒதுக்கணும்யா. அதுதானே நல்ல நிர்வாகம்!
மதுரைத்தமிழன்: சரி ஐயா வீரமணி, சுப. வீரபாண்டியன், மற்ற பகுத்தறிவுப் பேச்சாளர்கள் எல்லாரும் உங்களை உட்கார வச்சுக் கேள்வி கேட்டா என்ன சொல்வீங்க?
துரைமுருகன்: ஏம்பா எல்லாரும் வரிசையா வந்து கேள்வி கேட்கிறீங்க. பைபிள்ல வர்ற அந்தச் சம்பவம் ஞாபகம் இருக்கா? ஒரு பெண்ணைக் குற்றம் சாட்டிக் கல்லெறிய நிற்கும்போது, உங்களில் பாவம் செய்யாதவன் முதல் கல்லை எறியட்டும்னு இயேசு சொல்வாரே அந்த மாதிரி ஒரு ஏற்பாடு பண்ணிக்கலாமான்னு கேட்பேன்.
மதுரைத்தமிழன்: என்ன ஏற்பாடு ஐயா?
துரைமுருகன்: நம்ம இயக்கத்துலயும் கூட்டணியிலயும் இருக்கிறவங்க எல்லாரும் வரட்டும். குடும்பத்தினர் விருப்பம், பெரியவங்க ஆசை, சம்பந்தி வீட்டார் கட்டாயம்ன்னு எந்தச் சடங்குக்கும் இதுவரைக்கும் விளக்கம் சொல்ல வேண்டிய அவசியமே வராதவங்க முதல்ல கை தூக்கட்டும்!
மதுரைத்தமிழன்: யாரும் கை தூக்கலைன்னா?
துரைமுருகன்: அதுக்கு நீயா ஒரு அர்த்தம் கற்பிச்சுக்காதே! கேள்வியை இன்னும் தெளிவா கேட்போம். ரகசிய அர்ச்சனையோ, பரிகாரமோ, வேறொருத்தர் பெயர்ல பூஜையோ எதுவா இருந்தாலும், நமக்கொரு நியாயம், அடுத்தவருக்கொரு நியாயம்னு இருக்கக் கூடாதில்ல?
மதுரைத்தமிழன்: இதெல்லாம் யார் செய்தாங்கன்னு சொல்றீங்க?
துரைமுருகன்: நான் யாரு பேரையும் சொல்லலையே! எல்லாருக்கும் ஒரே அளவுகோல் வேணும்னுதான் சொல்றேன். ஆனா நீ பேனாவை எடுத்த உடனே பெயர் எழுதத் தயாராயிட்டே!
மதுரைத்தமிழன்: சரி கை தூக்கினவங்க உங்களைக் கேள்வி கேட்கலாமா?
துரைமுருகன்: தாராளமா கேட்கட்டும்! அவங்களுக்கு முதல்வரிசையில நாற்காலி போடச் சொல்றேன்.
மதுரைத்தமிழன்: மத்தவங்களுக்கு?
துரைமுருகன்: அவங்களும் உட்காரட்டும். எனக்குப் பதில் வரலைன்னா அவங்கவங்க குடும்ப விளக்கத்துல இருந்து உதவி கேட்கலாமில்ல!
மதுரைத்தமிழன்: இதுக்குத்தான் கல்யாண ஆல்பத்தையும் எடுத்துட்டு வரச் சொல்வீங்களோ?
துரைமுருகன்: ஆமாய்யா! பேச்சுக் குறிப்போட ஆல்பமும் இருக்கட்டும். கருத்துக்கும் நடைமுறைக்கும் தொடர்பு இருக்கான்னு பார்க்க வேண்டாமா?
மதுரைத்தமிழன்: வீரமணியிடமும் இதையே சொல்வீங்களா?
துரைமுருகன்: ஐயா, கேள்வித்தாளைப் பொதுவா வையுங்க. பதில் எழுதுறவங்க பெயரைப் பார்த்து மதிப்பெண் போடாதீங்கன்னு சொல்வேன்!
மதுரைத்தமிழன்: சுப. வீரபாண்டியனிடம்?
துரைமுருகன்: அண்ணே, குடும்பச் சூழ்நிலைங்கிற விளக்கம் செல்லும்னா எல்லாருக்கும் செல்லணும். செல்லாதுன்னா யாருக்கும் செல்லக்கூடாது. ஒருத்தருக்குக் கண்டனம், இன்னொருத்தருக்குச் சூழ்நிலை விளக்கம்னு இரண்டு கவுன்ட்டர் வேண்டாம்ன்னு சொல்வேன்!
மதுரைத்தமிழன்: சரி ஐயா அவங்களும் ஏதாவது சமரசம் செய்திருந்தா, நீங்க செய்தது சரியாகிடுமா?
துரைமுருகன்: சரியாகாது. ஆனா நீங்கள் ஏன் இப்படிச் செய்தீர்கள்ங்கிற கேள்வி, நாம் ஏன் இப்படி இருக்கிறோம்ன்னு மாறுமில்ல!
மதுரைத்தமிழன்: அதாவது தனிநபர் விசாரணையைக் கூட்டுப் பொறுப்பா மாத்திடுவீங்க!
துரைமுருகன்: தனியா என்னை மட்டும் மேடையில நிறுத்திட்டு, மத்தவங்க கீழே உட்கார்ந்து கைதட்ட முடியாதுல்ல!
மதுரைத்தமிழன்: மேடையில் பெரியார் முழக்கம் வீட்டில் வேத மந்திர முழக்கம் இதைத்தான் சொல்றீங்களா?
துரைமுருகன்: நீ தலைப்பைத் தயார் பண்ணிட்டே கேள்வி கேட்கிறியா?
மதுரைத்தமிழன்: நீங்க பதில் சொல்லச் சொல்லத் தலைப்பு தானா வருதுய்யா!
துரைமுருகன்: அப்படின்னா இதையும் எழுதிக்கோ. குடும்பத்துல எல்லாருக்கும் அவங்கவங்க நம்பிக்கைப்படி வாழ உரிமை இருக்கு!
மதுரைத்தமிழன்: நல்ல பதில் ஐயா. அப்போ அடுத்தவர் வீட்டுச் சடங்கையும் அவங்க விருப்பம்ன்னு விட்டுட வேண்டியதுதானே?
துரைமுருகன்: ......
மதுரைத்தமிழன்: நம்ம வீட்டுல அனுசரிப்பு அடுத்தவர் வீட்டுல மூட நம்பிக்கைன்னு சொல்ல முடியாதில்ல?
துரைமுருகன்: தம்பி உனக்குக் கல்யாணம் ஆயிடுச்சா?
மதுரைத்தமிழன்: என் கல்யாண ஆல்பத்தையும் எடுத்துட்டு வரச் சொல்லாதீங்க ஐயா! நான் மேடையில ஏறி யாருக்கும் கொள்கை வகுப்பு எடுக்கல!
துரைமுருகன்: நீ நிருபரா, வக்கீலா? எந்தப் பக்கம் திரும்பினாலும் அங்கேயே வந்து நிற்கிறே!
மதுரைத்தமிழன்: வீட்டுல ஒரு சடங்கை மாத்த முடியலன்னு சொல்ற நீங்க, மேடையில ஊரையே மாத்தச் சொல்றது எப்படி?
துரைமுருகன்: ஊர்க்காரங்க பேச்சைக் கேட்டுட்டுப் போயிடுவாங்க. வீட்டுக்காரங்க பதிலுக்குப் பேசுவாங்கய்யா!
மதுரைத்தமிழன்: கடைசியா ஒரு கேள்வி. இவ்வளவு நடந்தும் உங்க கொள்கை உறுதியாத்தான் இருக்கா?
துரைமுருகன்: அதுல என்ன சந்தேகம்? பத்திரமா இருக்கு!
மதுரைத்தமிழன்: எங்கே ஐயா?
துரைமுருகன்: அடுத்த பொதுக் கூட்டத்துல எடுத்துப் பேசுறேன்!
அன்புடன்,
மதுரைத்தமிழன்
#துரைமுருகன் #மதுரைத்தமிழன் #அரசியல்நையாண்டி #பகுத்தறிவு #திராவிடஅரசியல் #கற்பனைப்பேட்டி #TamilSatire #Duraimurugan #Dmk
Posts
0 comments:
Post a Comment
நான் அறிவு ஜீவி அல்ல ஒரு சாதாரணமான் மனிதன் தான்.இங்கு நான் பதியும் பதிவுகளில் உள்ள கருத்துகள் "மிகவும் சரி"யென்று சொல்லமாட்டேன் அது அன்றைய மனநிலையில் என் மனதில் எழும் கருத்துகளே...அதனால் உங்களது மனசுலபட்ட மாற்று கருத்துகளை தாராளமாக பகிரலாம். ஆனால் தேவையற்ற, வரம்புமீரிய, அநாகரிகமான வார்த்தைகளாலும் பதிவிற்கு சம்பந்தமில்லாமல் கருத்துக்கள் சொல்லப்பட்டால் எந்த வித பதில் விளக்கமின்றி அந்த கருத்து டெலீட் செய்யப்படும்.